sexta-feira, 19 de janeiro de 2018

Membru Governu 8 Tama Ona Prizaun

DILI - Durante nee, iha membru governu nain ualu maka tama ona prizaun, hodi kumpri desizaun husi tribunal, no husi sira nain ualu nee, iha nain haat maka livre ona.

Lia hirak nee, hatoo husi Diretor Nasional Dos Servisu Prizionais no Reinsensaun Sosial Helder Cosme Marcal Belo ba Jornalista sira iha nia knar fatin Kuarta, (18/01/2018).

“Dadus neebe maka iha durante hau sei direktur iha ministra ida, ministru ida, sekretariu estadu rua, ho tan direktor rua, eis administrador rua, sira maka tama ona prizaun, sira komete krime neebe maka liga ho korupsaun indentiku ida nee, ” dehan Helder.

Nia dehan, sira hirak neebe tama prizaun, nia la lalembra loron neebe sira tama, maibe sira maka hanesan Lusia Lobato, Joao Cancio, Domingos Caeiro, Abilio Lima, eis administrador Baucau Domingos, no eis administrador municipiu Dili Ruben Bras, inklui diretor obras publikas Jose Augusto, no mos Armindo husi seguransa sivil.

Hirak neebe agora dadaun detein hela iha prizaun hodi kumpri sira nia sentensa maka hanesan, Joao Cancio no Domingos Caeiro, no diretor obras publika Jose Agusto neebe tama iha tinan 2017, no Abilio Lima neebe tama iha tinan 2018 nee.

Iha fatin ketak, akademika UNTL Marcos Noronha hateten katak, ema neebe kumpri ona nia sala iha prizaun, sai mos ezemplu diak ida ba ema seluk. 

Terezinha De Deus | Suara Timor Lorosae

Sem comentários: