terça-feira, 5 de abril de 2016

FM ESTABELESE ESTRUTURA IHA VEMASSE


Partidu Frenti-Mudança  (FM), Sabadu (2/4/2016), estabelese estrutura iha Posto Administrativu Vemasse, Munisipiu Baucau.

Esforsu politika ne’ebe partidu FM halo hodi prepara an diak liu tan husi nasional to’o baze atu infrenta festa demokratiku (eleisaun jeral) iha tinan 2017. FM rasik hakarak iha elisaun jeral mai bele  aumenta tan kadeira iha Parlamentu Nasional husi rua iha tinan 2012.

“Partidu FM ne’e ema dehan ki’ik tanba kadeira 2 deit iha PN. La buat ida, diak liu husi kiik mak  sai ba boot, duke husi boot tun fali ba kiik,” afirma Sekretariu Jeral interino FM, Cesar Vital Moreira iha nia deskursu serimonia tomada posse eestrutura foun FM nian iha Suku Caicoa, Vemasse, Baucau.

Partidu  FM, Cesar esklarese katak, hamrik husi situasaun neebe difisil tebes. Husi  grupu kiik oan nia servisu fulan tolu deit bele hetan  rezultadu kadeira rua iha elisaun 2012. Tanba ne’e, Cesar fiar katak iha elisaun Parlamentar 2017, FM  sei aumenta tan kadeira iha Parlamentu Nasional.

Iha serimonia nee, Vise Sekretariu Jeral Munisipiu Baucau, Zacarias Xavier Correia Ximenes, mak fo tomada de posse ba eestrutura foun husi aldeia 4 Suku Caicua neebe asiste husi  Sekretariu Jeral Intrinu, Cesar Vital Moreira, Vise Sekretariu Jeral, Ricardo Cardoso Nheu, Luciano Timor Maubere, nudar membru Komisaun Politika Nasional (CPN), Sekretariu Munisipiu Baucau, Custodio de Jesus Freitas, Koordenador Postu Administrativu Vemasse, Alberto Piedade Amaral no Koordenador Universatariu, Letor Nino da Silva.

Cesar Moreira, hateten, Partidu FM hamrik iha situasaun neebe defisil husi grupu kiik oan ho responsibilidade neebe boot, tamba hakarak responde ejijensia no aspirasaun povu  neebe hakarak duni mudansa iha nasaun foun nee.

 “Haree ba  situasaun jeral iha ita nia nasaun, povu hakarak duni iha mudansa, tamba iha failansu barak akontese iha ita nia nasaun. Tamba nee mak, Partidu nee hamrik atu sai hanesan alternativa hodi responde povu nia situasaun,” hatete Cesar Moreira.

Cesar lia tun dehan, maske tinan 15 Timor Leste hetan independensia, maibe sei iha failansu barak neebe presiza hadia no presiza iha mudansa, liu-liu ba buat neebe relasiona ho povu nia nessesidade hanesan estrada, bee mos, eletrisidade, saude no eskola.

“Hau fo ezemplu deit katak  natar barak iha Vemasse abandona tamba bee laiha, tamba saida mak bee laiha, ida nee perguntas  ba ita hotu  atu  bele hetan responde. Partidu FM hamrik atu hadia failansu sira nee. Maibe, Partidu FM lakohi promote, hakarak lia los. Mai ita servisu hamutuk  hodi hadia failansu sira nee,” hateten Cesar Moreira.

Cesar Morreira dehan, problema seluk neebe povu infrenta agora mak rai, tamba agora daudaun rai barak mak okupa  tiha ona  husi ema neebe iha osan no poder.  Nia fo ezemplu katak iha Dili, povu neebe laiha osan laiha rai atu hela.  “Rai iha Dili nee, ema rua ka tolu nian deit. Povu sira dudu sae ba foho leten hotu. Kazu hanesan nee labele akontese iha Vemase, Munisipiu Baucau. Partidu FM hakarak hadia failansu sira nee,” dehan Cesar Morreira.

Vise Sekretariu Jeral, Ricardo Cardoso Nheu, liu husi nia diskursu husu ba estrutura foun neebe simu pose atu kaer metin doutrina hat (4)  Partidu FM nian  hanesan mata dalan bainhira  halao knar iha baze. Tamba nee, katak Ricardo Nheu, simu posse nee hanesan mos simu todan ida no responsibilidade boot iha familia boot ida nee nia leet.

“Ita boot sira simu pose nee hanesan simu todan ida no resposabilidade boot, tamba ita boot sira tenke brani hamrik iha oin atu koalia no depende  lia los, koalia buat neebe ita nia povu infrenta hela. Tamba nee, estrutura neebe agora kamarada sira prienxe laos eestrutura mate, maibe eestrutura moris,”  hateten Ricardo Nheu.

Nia hatete, doutrina hat neebe  mak sai hanesan mata dalan ba estrutura foun bainhira halao knar iha baze mak  brani depende buat neebe los,  kamarajen (hotu-hotu iha direitu hanesan), estuda no aprende no vida moris iha ekonomia.

Ricardo Nheu hateten, progresu Partidu FM avansadu tebes, tamba agora daudaun Partidu FM hahu ona halo kaderizasaun iha universidade sira neebe iha Dili no kuaze 98 porsentu estudante universatoriu sira hamutuk ona ho Partidu FM.

Iha biban nee,  Komisaun Nasional Politika, Luciano  Timor Maubere, husu ba estrutura foun neebe simu pose atu halao nia knar ho diak, tamba  objetivu  aumenta estrutura husi nasional to’o baze nee atu haforsa tan politika partidu nee nian molok atu tama elisaun parlamentar 2017.

Luciano hatete, iha tinan 15 Timor Leste independensia, husi primeiru governasaun to’o VI governu Konstitusional mosu failansu barak neebe presiza hadia no presiza mudansa. “Partidu FM hamrik  tamba hakarak mudansa failansu sira nee. Hakarak mudansa maka elisaun 2017 vota ba Partidu FM. Ita vota laos hare ba bandeira partidu, tamba bandeira la ukun ita, ema ho ema  mak ukun malu. Maibe la bele sala hili ema. Ita lakohi ema neebe uluk lakohi Timor ukun an, ema neebe uluk oho no sunu ita nia uma ukun fali ita. Imi tenke neon nain matan moris, sala hili ema maka ita sei terus hanesan nee,” katak Luciano.

Koordenador  Partidu  FM Postu Administrativu Vemasse, Alberto Piedade Amaral hatete demokrasi laiha amiasa no laiha presaun, demokrasia signifika  katak  ema hotu liberta atu hili partidu saida deit, maibe realidade hatudu katak partidu barak mai hakbesik an ba povu molok atu tama elisaun, elisaun hotu sira haluha ona povu no la realiza  buat neebe sira promete ba povu.

“Partidu FM lakohi halo promote ba povu, maibe partidu FM hakarak hamutuk ho povu atu mudansa problema  sira neebe  ita nia nasaun infrenta hela.  Partidu FM sai hanesan alternativa atu lori sai povu nia situasaun. Povu nia nessesidade nee barak teb-tebes, maibe aspirasaun neebe povu hato’o tama deit iha lixu, laiha responde. Tamba nee mak, Partidu FM hamrik atu hadia failansu sira nee,” hatete Alberto.

Sekretariu Partidu FM Munisipiu Baucau, Custodio  de Jesus Freitas husu mos ba estrutura foun atu halao servisu ho diak atu nunee iha elisaun oin mai, Partidu FM neebe iha elisaun parlamentar 2012  hetan votus rihun rua resin bele aumenta barak liutan iha elisaun parlamentar 2017.

Serimonia tomada de posse nee taka ho han hamutuk no dansa. Iha Dili, Domingu (3/4/2016)  Partidu FM halo sosializasaun no fo tomada de posse eestrutura foun iha fatin lima iha Dili. nes

Jornal Nacional

Sem comentários: