Timoroan Tenke Fó Onra Ba Lider Istóriku

DILI, (TATOLI) - Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur husu ba timoroan sira atu fó onra ba lider istóriku sira hanesan Xanana Gusmão, Marí Alkatiri, José Ramos Horta no Taur Matan Ruak para sira nia naran ne’e morin nafatin to’o sira mate.

Lider istóriku hirak ne’e, maski iha diferensa ideia ba kontestu governasaun, maibé la signifika sira fahe malu. Governu foun ne’ebé mai la’ós ema seluk maka iha ne’ebá, lider istóriku no lider nasionál rua hanesan Kay-Rala Xanana Gusmão no Taur Matan Ruak maka iha ne’ebá.

“Povu kontinua depozita konfiansa ba sira. Ha’u nunka fiar sira na’in rua hanoin at ba nasaun, maibé ema balun ne’ebé tuir sira na’in rua ne’e maka ita tenke kuidadu. Tenke matan moos ba sira tanba durante tinan sanulu ukun gasta orsamentu biliaun ba biliaun, maibé laiha rezultadu signifikativu ba povu,” Lere hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, kuarta ne’e, bainhira husu ninia prespetiva kona-ba Governu foun ne’ebé mai ne’e.

Nu’udar militár, Lere afirma, sira neutru ka la hali’is ba partidu ruma tanba interese nasaun maka importante liu buat hotu, nune’e bele lori povu ba moris di’ak.

Jornalista: Xisto Freitas | Editór: Manuel Pinto

Imajen: Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur.