quarta-feira, 23 de maio de 2018

Facebook Halo Fen Laen Hurlele Malu

DILI - Arguidu ho inisial NM ho lezada SCG, tenki lori malu ba tribunal, tan deit arguidu NM, atensaun liu halimar facebook la prekupa nia oan tanis.

Tuir akuzasaun husi Ministeriu Publiku neebe tribunal lee sai katak, iha loron 19 fulan Setembru tinan 2016 iha Bairro Pite, arguidu NM loke hela facebook, la prekupa sira nia ona neebe tanis. Tanba nee lezada sai husi uma laran mai, hirus arguidu, nunee sira nain rua hahu deskute malu.

Momentu sira deskute malu hela, arguidu fo tuku dala rua iha lezada nia oin, maibe lezada satan netik tiha kona fali lezada nia liman, hodi rezulta moras no bubu.  Arguidu kontinua kaer lezada nia kakorok, hodi soe ba kama leten.

Ho hahalok nee Ministeriu Publiku akuza arguidu ho lei numeru 7/2010 violensia domestika konjuga ho krime ofensas integridade fisiku simples artigu 145 tuir kodigu penal Timor Leste.

Hatan ba akuzasaun nee, arguidu deklara faktus balun los no balun la los, nia konsidera la los mak nia la tuku lezada, maibe basa deit.

Iha fatin hanesan lezada esklarese, problema sira nain rua nee tan deit arguidu prekupa deit ho facebook, la prekupa sira nia oan, neebe tanis hakarak halimar game.

 Audensia julgamentu nee, prezide husi Juiz singular Maria Modesta, Ministeriu Publiku reprezenta husi prokurador Nelson Carvalho, arguidu hetan asistensia legal husi defensor publiku Olga Barreto.  

Notisia kompletu lee iha jornal STL edisaun Kinta, (23/05/2018).
Terezinha De Deus | Suara Timor Lorosae

Sem comentários: