DILI, (TATOLI) – Amu Bispu
Dioseze Dili, Don Virgilio do Carmo Guterres, espera partidu ne’ebé manan
eleisaun antesipada bele realiza promesa sira bainhira ukun.
“Durante tinan ida, roda governu
paradu. Ita nian esperansa mak governu ida forte, estavel, no garante
transparénsia, pás, armónia no dezenvolvimentu ba povu”, Amu Bispu ba
jornalista sira, kinta ne’e iha Igreja Katedrál hafoin prezide misa
agradesementu hosi partidu koligasaun Aliansa Mudansa ba Progresu (AMP).
Ulun boot Dioseze kapitál Nasaun
ne’e enkoraza governu foun atu hakat ba oin, promove nafatin dame no
estabilidade. Hodi hatutan: “Sé de’it mak povu fó fiar, Igreja prontu atu
kolabora ba rai no povu nian di’ak”.
Don Virgilio mós lakohi atu
komenta kona-ba figura Primeiru-Ministru hosi AMP. “Estatuta koligasaun partidu
mak sei regula. Mas importante mak ita presiza figura ida ne’ebé hakuak ema
hotu ho mehi ida lori povu ba moris di’ak”, akresenta.
Amu Virgilio iha ninia omilia ba
misa agradesementu hosi AMP hatete lia-fuan obrigadu ne’e manifesta favór
ne’ebé simu hosi ema seluk tanba, marka vertude ida fundamentál.
“Ema ne’ebé fó obrigadu tanba
rekoñese nia limitasaun, rekoñese ida seluk nia tulun no apoiu. Dala-barak buat
di’ak oioin ne’ebé ita hetan hosi Nai Maromak, dala-barak mós ita la apresia,
ezemplu moris, saúde, família, amizade, armonia, pás no seluktán”, katak tan.
Partisipa hosi misa ne’e,
Prezidente AMP, Kay Rala Xanana Gusmão, portavós AMP, Taur Matan Ruak ho ninia
espoza, estrutura hosi partidu koligasaun AMP, sarani no konvidadu sira seluk.
Jornalista: Egas Cristóvão | Editora:
Rita Almeida
Imajen: Prezidente partidu
koligasaun AMP, Kay Rala Xanana Gusmão, komprimenta Amu Bispu, Virgilio do
Carmo Guterres, hafoin misa agradesementu iha Igreja Katedrál Dili, ohin. Foto
Egas Cristovão
Sem comentários:
Enviar um comentário