terça-feira, 24 de abril de 2018

Taur Matan Ruak: Uniaun hosi opozisaun "la'ós fásil" maibé objetivu maka manán


Uniaun hosi partidu opozisaun tolu iha Timor-Leste "la'ós fásil", maibé agora iha "objetivu úniku", maka manán eleisaun antesipadu iha loron 12 Maiu, Taur Matan Ruak, númeru daruak hosi koligasaun, hatete ba ajénsia Lusa.

"Dalan ne'e la'ós fásil maibé ami senti determinadu tebes no ami iha objetivu úniku: manán eleisaun sira, harii Governu ba daualuk", hatete hosi númeru daruak hosi Aliansa Mudansa ba Progresu iha entrevista ida ba Lusa.

Prezidente hosi Partidu Libertasaun Popular (PLP), Matan Ruak, hamutuk ho Congresso Nacional da Reconstrução Timorense (CNRT), hosi Xanana Gusmão, no mós Kmanek Haburas Unidade Nacional Timor Oan (KHUNTO), hosi José Naimori.

Sira na'in tolu - Xanana ho Matan Ruak, ne'ebé hatais hanesan iha rezisténsia, Naimori ho hatais tradisional - fó kór ba imajen hosi koligasaun ida ne'ebé mosu maioritáriu, iha opozisaun, iha parlamentu, maibé ho partidu sira ne'ebé, seidauk to'o tinan ida, iha hahalok ne'ebé la hanesan kona-ba nasaun nia futuru.

Evidensia iha problema maka'as sira entre Taur Matan Ruak - ne'ebé kompara ona Xanana Gusmão ho Suharto - no Xanana Gusmão ne'ebé hatán hodi fó fali medalla ne'ebé maka entrega hosi Prezidénsia.

Hafoin tinan barak nia laran ba aproximasaun maka'as entre Xanana Gusmão ho Mari Alkatiri, sekretáriu-jeral Fretilin nian - partidu ne'ebé viabiliza ona Governu minoritáriu CNRT nian iha tinan hirak ikus ne'e, no ne'ebé agora lidera ezekutivu minoritáriu ho PD - situasaun muda ona. Xanana Gusmão agora hamutuk ho Taur.

"Ami iha relasaun emosional ida, maski iha diferensa sira. No la'ós de'it agora. Maibé respeitu, domin, kariñu entre ami iha nafatin. Ne'e hanesan razaun ida hodi manán funu [hasoru okupasaun indonéziu], tanba bainhira ho dalan seluk ami fahe nasaun", nia esplika.

"Ami senti determinadu hodi manán. 80% hosi sira ne'ebé maka agora iha kamou ne'e hanesan joven, maibé bainhira ami ko'alia kona-ba luta - ne'ebé sira barak la partisipa -, sira identifika. Ne'e hanesan estraordináriu", nia esplika.

Dezde hahú kampaña, Xanana Gusmão ho Taur Matan Ruak mosu hamutuk iha palku, hodi halo sira nia krítika diretamente ba Fretilin ho Mari Alkatiri.

Taur Matan Ruak hatete katak buat hotu "iha nia faze sira" no esplika katak hanesan ba dala uluk maka iha "troka" krítika sira ne'e, hodi insisti katak hanesan hosi parte AMP nian hodi hatán ba hahalok sira hosi Fretilin.

"Tanba Fretilin nega ami nia esforsu. Bainhira ha'u nu'udar Prezidente, Fretilin hatete katak ami la'ós abut sira, sira maka hanesan abut. Hanesan asaun ne'ebé ami la aseita. Sira estraga oituan istória, liuliu hamenus kontribuisaun hosi ema sira", nia hatete.

"Buat ne'ebé ami halo iha faze dahuluk maka doko oituan sosiedade, hatete katak ami mai hosi ne'ebé, ami iha ne'ebé no ami hakarak ba ne'ebé. Faze daruak maka foka iha saida maka ami hakarak halo iha tinan lima oinmai", nia esplika.

Nia hatete katak halibur programa sira ne'ebé la hanesan entre CNRT ho PLP "la'ós susar".

"Tanba ha'u la kontra projetu boot sira. Ha'u nunka hatete katak lakohi megaprojetu sira. Ha'u nia pergunta maka tansá maka ita iha osan ba megaprojetu sira no laiha osan ba bee, ba eskola sira, ba estrada rural sira", nia afirma.

"Ha'u suspende ona orsamentu hodi insisti atu Governu aumenta orsamentu ba edukasaun, agrikultura, saúde, dezenvolvimentu rural, ba área primária sira ne'e. Ami presiza kombina prazu badak, média ho prazu naruk", nia esplika.

Nia hatete aktak ne'e maka hanesan objetivu hosi AMP - avansa ho saida maka halo di'ak maibé hatán ba nesesidade báziku sira hosi populasaun.

Nia hatete katak hakerek História ne'e husik ba historiador sira: "Ami sei ajusta fali buat balun, maibé restu husik ba historiador sira".

Kampaña hala'o to'o loron 09 Maiu.

SAPO TL ho Lusa

Sem comentários: