Preparativu sira ba lejislativu
antesipadu sira iha Timor-Leste besik hotu ona, no karik, iha loron hirak
tuirmai impresaun hosi boletin sira votu nian hodi fahe iha nasaun laran no iha
sentru sira votasaun nian iha estranjeiru, hatete hosi responsável eleitoral
sira iha loron-sesta ne'e.
"Preparasaun hala'o ho di'ak
no kuaze 90% ami prontu ona", hatete hosi diretor-jeral hosi Sekretariadu
Tékniku hosi Administrasaun Eleitoral (STAE), Acilino Manuel Branco, iha
deklarasaun sira ba jornalista sira.
Aspetu importante ida, impresaun
hosi boletin sira votu nian, sei konklui iha loron rua tuirmai no
"material sensível" ba eleisaun sira, hanesan boletin sira votu nian,
urna sira ho kadernu eleitoral sira, hahú fahe iha inísiu fulan-Maiu.
Parte balun hosi boletin votu
hamutuk rihun 870 resin sei lori rasik hosi grupu ida hosi responsável
eleitoral sira ne'ebé nomeia hosi Ministériu Negósiu Estranjeiru timoroan nian
hodi akompaña prosesu votasaun iha sentru votu sia iha estranjeiru.
"Ami iha eleitor barak iha
estranjeiru duké iha tinan liubá no, tanba ne'e, tinan ne'e ami iha tan sentru
tolu duké lejislativu tinan 2017 nian: ida iha Porto no rua iha Reinu
Unidu", nia hatete.
Responsável eleitoral sira iha
estranjeiru sei simu formasaun iha Díli iha loron 02 ho 03 Maiu. Iha loron 04
Maiu sei ba nasaun haat, ne'ebé ema timoroan sira bele vota: Austrália,
Koreia-Súl, Reinu Unidu ho Portugal.
Material tomak, inklui boletin
sira votu nian, sei haruka, hafoin kontajen iha sentru sira votasaun iha estranjeiru,
ba Komisaun Nasional Eleisaun nian (CNE) ne'ebé sei halo apuramentu final
nasional no rezolve reklamasaun ba votu ruma.
Acilino Manuel Branco ko'alia iha
konferénsia imprensa ida hamutuk ho ministru Administrasaun Estatal timoroan
nian, Valentim Ximenes, iha sede STAE nian, iha Díli, hodi halo atualizasaun
kona-ba preparativu ba lejislativu antesipadu iha loron 12 Maiu.
Valentim Ximenes hatete ba
jornalista sira katak ekipa sira hosi Obra Públika kontinua serbisu iha fatin
oioin iha nasaun hodi hadi'a problema ki'ik sira ne'ebé ezisti ba asesu sira
hosi sentru votasaun balun.
"Ekipa sira iha fatin ona no
hadi'a problema ki'ik sira, garanti mós katak iha eletrisidade iha sentru sira
votasaun ne'ebé defini ona", governante ne'e esplika.
Partidu ho koligasaun ualu
aprezenta ona ba eleisaun ne'ebé iha ona resenseamentu hosi eleitor hamutuk
787.761, liu 22.903 hosi sira ne'ebé maka bele vota ona iha eleisaun
lejislativu loron 22 Jullu tinan liubá, ne'ebé reprezenta aumentu hosi 3%
resin.
SAPO TL ho Lusa
Sem comentários:
Enviar um comentário