sábado, 17 de março de 2018

Xanana: Hermenegildo Mak Bele Halo Relatóriu FM Ba Estadu

PARTILHAR

DILI, (TATOLI) – Xefe Negosiadór ba Delimitasaun Fronteira Marítima, Kay Rala Xanana Gusmão, afirma Ministru Adjuntu Primeiru-Ministru ba Negosiasaun Fronteira Marítima, Hermenegildo Pereira (Agio Pereira), mak bele halo relatóriu ba Estadu.

“Ha’u la’ós membru governu, ekipa negosiasaun Fronteira Marítima (FM) ita bolu ajente Timor-Leste, entaun atu aprezenta relatóriu FM tenke hosi Ministru Adjuntu Primeiru-Ministru ba Negosiasaun FM, Agio Pereira”, afirma Xanana Gusmão ba jornalista sira iha sede CNRT, Bairu Grilos, sesta (16/3).

Kompozisaun Governu iha VII Governu Konstitusionál iha Ministru Adjuntu Primeiru Ministru ba Negosiasaun FM, Hermenegildo Pereira nu’udar ajente Estadu, entaun nia mak bele halo relatóriu ba Estadu.

“Nune’e, Primeiru-Ministru, Marí Alkatiri, sei la husu ha’u atu aprezenta relatóriu maibé nia sei husu ba Agio Pereira”, afirma Xanana.

Enkuantu, molok 6 marsu, Konsellu Ministru hasai ona rezolusaun hodi permite Agio Pereira mak ba hanesan membru governu eh ajente Estadu.

Xanana husu deskulpa ba Estadu eh governu tanba la’ós nia mak halo relatóriu maibé membru governu mak tenke halo relatóriu bazea ba rezolusaun ne’ebé asina.

“Ha’u la’ós membru governu, servisu atu manan FM la’ós asinatura maibé manan FM mak povu nia hakarak”.

Akordu delimitasaun ketan tasi entre TL ho Austrália asina ona iha Novaiorke iha loron 6 fulan ne’e loron Amerika nian. Entretantu iha TL loron 7 fulan-marsu.

Jornalista: Zezito Silva | Editora: Rita Almeida
PARTILHAR

Author: verified_user

Publicação luso-timorense sem fins lucrativos

0 comentários: