Labele Kontente De’it Manán Fronteira Marítima

DILI, (TATOLI) - Ministru Defeza no Seguransa (MDS), José Agostinho Sequeira Somotxo hateten labele kontente de’it bainhira  manán fronteira marítima, maibé tenke preokupa mós seguransa iha fronteira marítima.

“Nu’udar MDS, la’ós kontente de’it ita manán maibé preokupa seguransa iha ita nia fronteira marítima tanba nasaun sira ne’ebé sempre tulun ita ba fronteira marítima, ohin loron hafoin asinatura akordu Fronteira Marítima iha 6 Marsu liu-ba, sira husik ona mai ita atu kontrola ita nia fronteira mesak,” Somotxo hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, tersa ne’e, hafoin soru-mutu ho Prezidente Repúblika, Francisco Guteres Lú Olo, kona-ba seguransa ba fronteira tasi.

Nia haktuir katak Timor-Leste seidauk iha meius atu kontrola fronteira tasi ne’ebé luan tebes ne’e tanba ró patrolallamentu militár ne’ebé oras ne’e Timor-Leste iha laiha kbiit atu halo patrollamentu to’o iha tasi mane.

“Ita hotu hatene katak ita laiha buat ida atu asegura ita nia fronteira marítima. Tanba ne’e maka hanesan MDS, ha’u hato’o preokupasaun ida ne’e  ba Primeiru Ministru no Prezidente Repúblika,” Somotxo informa.

Iha biban ne’e, Xefe Estadu Lú Olo indika Ministériu Defeza no Seguransa atu tau matan ba asuntu ne’e, tanba ne’e, MDS Somotxo lori proposta konstrusaun ró militár patrollamentu foun hatudu ba Prezidente Repúblika.

Ró refere, nia tenik, iha hela faze konstrusaun iha Austrália no sei to’o iha tinan 2022. Ró hamutuk rua ne’e ró boot ne’ebé doasaun hosi Governu Austrália no bele halo patrollamentu iha área tasi mane.

Jornalista: Xisto Freitas | Editór : Manuel Pinto

Imajen: Ministru Defeza no Seguransa, Agustinho Sequeira “Somotxho”. Imajen Mídia Palásiu PR.