sexta-feira, 19 de janeiro de 2018

Zenilda Gusmão Hetan Buska La’ós Persegisaun


DILI, (TATOLI) – Ministru Defeza no Seguransa, José Agostinho Sequeira “Somotxo” klarifika katak sétimu governu la halo persegisaun ba Zenilda Gusmão, maibé governu mós sei la interfere servisu justisa nian, relasiona ho mandadu buska apreensaun ba emprezária Zenilda Gusmão.

“Sira nia sala mak sees hosi impostu, dezde 2013 to’o 2018, entaun ohin loron Ministériu Públiku deteta liuhosi impostu katak kompañia na’in mak Zenilda Gusmão,” Ministru José Agostinho Sequeira “Somotxo”  klarifika liuhosi konferénsia imprensa iha Ministériu Interiór, Sesta (19/01).

“Ami husu ba públiku katak governu ida ne’e la iha intensaun polítika ruma atu persege família sé de’it,” Somotxo afirma.

Governu nia servisu la interfere servisu justisa nian, tanba ne’e karta mandadu buska hosi Ministériu Públiku (MP) ne’ebé ezekuta hosi Polísia Nasionál Servisu Investigasaun Kriminál, iha loron Kinta, (18/01) tuir lei ho orden.

Nune’e nia husu ba públiku tomak atu labele halo manipulasaun ba informasaun, polísia nasionál ezekuta orden hosi Ministériu Públiku ne’ebé identifika katak Zenilda Gusmão, nu’udar na’in ba kompañia (la temi naran) hahú hosi tinan 2013 to’o 2018 la selu impostu ba Estadu, nune’e Ministériu Públiku (MP) hatún mandadu buska ba Zenilda.

Iha parte seluk, Komandante Jerál Polísia Nasionál Timor-Leste (PNTL), Julio Hornay husu ba Zenilda Gusmão nu’udar sidadaun tenke koopera ba mandadu buska hosi Ministériu Públiku nian.

“Los duni katak horisehik Polísia halo buska ba rezidénsia, Zenilda Gusmão no nia la’en, Superintendente Pedro Belo (Komandante PNTL Munisípiu Dili), sira koopera di’ak. Prosesu justisa mak nune’e.”

Entretantu Servisu Investigasaun Kriminál (SIK) ezekuta Mandadu buska hosi Ministériu Públiku, Kinta, (18/01) ba rezidénsia, kompañia no Edifísiu Emprezária Zenilda Gusmão nian, apreende ona karreta ho marka Cooper ho númeru matríkula A.14.309.TL. Karreta ne’e agora daudaun para iha ona Kuartél Jerál PNTL.

La selu taxa ka impostu tuir kódigu penal konsidera komete krime “Fraude de Fiskál” ne’ebé nia pena tinan lima ba leten, enkuantu prejuizu boot pena bele to’o tinan 10 ba leten.

Bainhira ezekuta ona mandadu buska apreensaun, tuir kódigu prosesu penal asegura arguidu durante oras 72, hodi aprezenta ba Tribunál hodi halo primeiru interrogatóriu.

To’o notísia ne’e hatún parte Tatoli sei halo tentativa hodi hatene paradeiru arguidu nian, inklui prosesu ne’ebé sei tuir mai, basa Tatoli tenta ona husu klarifikasaun ba parte polísia maibé lá konsege.

Jornalista: Zezito Silva | Editór: Manuel Pinto

Imajen: Ministru Defeza no Seguransa (MDS), José Agostinho Sequeira “Somotxo”

Sem comentários: