sexta-feira, 19 de janeiro de 2018

Turizmu Baze Komunitária Prioridade Ba MT


DILI, (TATOLI) - Ministru Turizmu, Manuel Vong, hatete iha modelu turizmu ne’ebé atu dezenvolve mak dezenvolvimentu turizmu baze komunitária katak komunidade mak tenke sai na’in, tanba ne’e hadi’a uluk komunidade nia uma duké harii uluk cinco estrelas.

“Hadi’a komunidade nia uma, ezemplu iha Metiaut ita haree koitadu povu oan sira-nia uma iha kedan ninin, Ilimanu mós, se ita gasta dolar millaun ida para hadi’a komunidade nia uma, maibé besik ba tasi-ibun, turista sira mai, bá hela iha uma sira ne’e, ita hadi’a kuartu haat de’it, rua ba na’in, rua ba turista, no hadi’a haris-fatin”, Vong hatete iha Sentru Konvensaun Dili, horisehik.

Atu nune’e turista sira mai bá toba iha uma ne’e, uma di’ak ba na’in no ba bainaka, tanba ne’e objetu turístiku ne’ebé abitante sira hela besik fó prioridade ba ida ne’e.“Ita buka atu hadi’a uluk komunidade nia moris”.

Ministru afirma katak ambiente moos maka turista mós hakarak, saúde di’ak, maibé atu halo ambiente ida ne’e moos hakarak mak tenke tau uluk osan hafoin halo serbisu tanba ne’e hadi’a no labele husik ambiente fo’er. “Ita jere didi’ak lixu ne’e hahú husi uma”.

Tuir Planu Estratéjiku Dezenvolvimentu Nasionál (PEDN) 2011-2030 iha zona turístika tolu mak orientál, sentrál no osidentál. Ba zona tolu ne’e iha estratéjia ida efetivu liu mak Sentru Apoiu Dezenvolvimentu Integradu Abranjente (SADIA).

“SADIA ne’e sei tau iha zona tolu ne’e, hahú husi zona tun bá munisípiu, ba postu adminitrativu no tun ba suku, nune’e kada suku bele iha produtu ida. Karik ida ne’e ita halo, ha’u otimista tanba iha 2017 liubá ita iha turista pur volta mil 60, ita hatama osan husi ne’e pur volta millaun 51 tinan ida”.

Aleinde ne’e ministru hatutan foin daudaun simu mós emprezáriu boot husi Malázia, Hongkóng ne’ebé hakarak atu investe iha Timór iha setór indústria turístika, maibé emprezáriu sira ne’e hakarak atu lori turista mil 500 to’o millaun iha mai Timór.

“Pergunta mak ne’e, sira ne’e atu toba, hela, han iha ne’ebé? Se ita hanesan autoridade lokál, ita hanesan uma na’in atu han de’it mós lato’o ona, turista mai tan oinsá? Bainaka ida mai lori kedan nian bukae ou osan rai hela iha ne’e”.

Jornalista : Maria Auxiliadora | Editór: Manuel Pinto

Foto/Google.

Sem comentários: