sexta-feira, 19 de janeiro de 2018

Mari Alkatiri hatete katak sei desmonta proposta sensura "lahó méritu" hosi opozisaun


Iha loron-kinta ne'e, primeiru-ministru timoroan afirma katak sei ba Parlamentu, iha fulan ne'e nia rohan, hodi "desmonta" proposta sensura, ne'ebé nia konsidera "lahó méritu" ne'ebé aprezenta hosi opozisaun maioritáriu no ne'ebé nia aprovasaun sei implika atu Governu tuun. 

"Ha'u sei desmonta surat-tahan ne'ebé sira bolu proposta sensura nain no ne'ebé laiha méritu ida. Laiha razaun ida, substansial, hosi matéria, hodi iha proposta sensura nian", Mari Alkatiri hatete ba Lusa iha Palásiu Prezidensial, iha Díli.

Hatán kona-ba karik sei kontinua iha funsaun sira bainhira Governu monu no hela iha jestaun to'o fó pose ba Governu tuirmai, Alkatiri hatete katak sei halo komentáriu hafoin debate.

"Husik to'o iha loron 31 Janeiru no hafoin ne'e maka ita ko'alia. Husik atu loron ne'e to'o", nia afirma no refere ba loron ne'ebé maka sei hahú debate proposta iha Parlamentu Nasional.

Mari Alkatiri ko'alia ba jornalista sira hafoin enkontru semanal ho Prezidente timoroan, Francisco Guterres Lu-Olo, ne'ebé hato'o asaun foun hosi Governu.

Iha loron 31 Janeiru, Governu sei ba Parlamentu Nasional hodi hatán ba proposta sensura ida ne'ebé aprezenta hosi opozisaun maioritáriu, iha debate ida ne'ebé bele dura to'o loron tolu no hotu, iha loron 02 Fevereiru, ho ezekutivu tuun.

Timor-Leste, iha fulan barak nia laran, hasoru hela períudu polítika ne'ebé laloos ho opozisaun, maioria iha Parlamentu Nasional, xumba programa Governu nian no proposta ida hosi Orsamentu Retifikativu, no aprezenta ona proposta ida sensura nian ba ezekutivu no proposta ida hodi hatún prezidente parlamentu nian.

Iha tinan 2017 nia rohan, Parlamentu laiha sesaun plenáriu durante fulan ida ho prezidente Aniceto Guterres defende katak ne'e akontese tanba iha debate ba Orsamentu Retifikativu, ne'ebé la liu. Tinan ne'e seidauk iha sesaun plenáriu ruma, maski rejimentu defini katak hala'o baibain iha loron-segunda ho loron-tersa sira.

Bainhira Governu monu, Prezidente timoroan bele hili entre solusaun governativu foun ida ho atual Parlamentu, Governu ida hosi inisiativu prezidensial, ka konvokasaun eleisaun prezidensial sira ne'ebé bele konvoka de'it liutiha fulan ne'e hosi eleisaun anterior sira, ne'ebé akontese iha loron 22 Jullu liubá.

Votu ida bele akontese de'it liutiha fulan neen, nune'e implika atu eleisaun sira halo de'it hafoin inísiu hosi fulan-Abril.

SAPO TL ho Lusa

Sem comentários: