Karketu Dili FC Kontratu Treinadór Foun Troka Simon Pablo

DILI, (TATOLI) - Treinadór estranjeiru hosi Moldova, Arcan Iurie, sei sai treinadór ba Karketu Dili FC iha Liga Futeból Amadora (LFA) époka 2018 ne’ebé sei hahú iha fulan oin.

“Ami iha ona kontatu ho treinadór refere no iha tempu badak ami sei fó kuñesementu ba públiku tomak. Antes ne’e, ami nia ekipa hasoru malu dahuluk ona ho treinadór ne’e iha tinan kotuk, 2016,” tenik dirijenti Karketu Dili FC, ne’ebé lakohi temi nia naran ba mídia, foin lalais ne’e, iha sede Karketu Dili FC, Dili.

Arkan Iurie hala’o nia kareira ba dahuluk iha nasaun viziñu Indonézia hahú hodi treinu ekipa Persija Jakarta no konsege lori to’o finál Divizaun Prinsipál (Devisi Utama) Liga Indonézia iha  2005 maibé lakon 0-2 kontra Persipura Jayapura. Aleinde ne’e, iha finál Kopa Indonézia mós nia ekipa lakon tan (3-4) kontra ekipa Arema Malang.

Iurie mós konsege treina ekipa boot seluk hanesan Persib Bandung, Persik no Persebaya Surabaya.

Ekipa Karketu Dili FC, lori treinadór estranjeiru ne’e hodi troka pozisaun ne’ebé husik hela treinadór hosi Chile, Simon Pablo, ne’ebé oras ne’e halao nia kna’ar foun hanesan treinadór ba ekipa Segunda Divizaun hosi Aceh iha Liga Indonézia.

Alein ne’e, klube ne’ebé kuñesidu ho lema “Matak Malirin” ne’e mós kontratu tan eis kapitaun selesaun nasionál, José Carlos Fonseca, ne’ebé tuir planu sei hahú jogu ba dahuluk iha Marsu mai ne’e.

“Ami mós sei reforsa hosi eis jogadór selesaun nasionál no Cacusan FC, José Fonseca,” dirijente Karketu Dili FC ne’e informa.

Jornalista: Xisto Freitas | Editór: Manuel Pinto

Imajen: Treinadór foun Karketu Dili FC, Arcan Iurie (foto liman karuk). Imajen Mídia LFA.