sexta-feira, 19 de janeiro de 2018

Jogu Primeira Divizaun LFA Époka 2018 Adia Ba Marsu


DILI, (TATOLI) - Jogu Primeira Divizaun Liga Futeból Amadora (LFA) époka 2018 ne’ebé tuir loloos hahú iha 22 Fevereiru, adia fali ba iha 1 Marsu tanba kesstaun orsamentu.

Desizaun adia jogu ida ne’e liuhusi enkontru entre Órgaun Ezekutivu Liga Futebol Amadora (LFA) ne’ebé lidera hosi Prezidente LFA, Nilton Gusmão dos Santos, ho prezidente klube 8 Primeira Divizaun Liga époka 2018.

“Desizaun hodi muda ba iha 1 Marsu ne’e bazeia ba inisiativa hosi prezidente klube 8 ne’e, atu nune bele apár ba osamentu Duo Désimu ne’ebé tuir informasaun hosi Sekretaria Estadu Desportu Promosaun Alta Kompetisaun prosesa ona. Aleinde ne’e, bele fó mós serteza ida ba klube sira kona-ba osamentu ba liga nian ne’e katak iha duni atu nune’e klube bele halo planu ona hodi kontratu jogadór sira,” Diretór Kompetisaun LFA, Martinho Ribeiro dehan ba mídia iha D’City Hotel, Bebora, foin lalais ne’e.

Martinho hatutan kona-ba oráriu jogu Segunda Divizaun nian nafatin hala’o iha Fevereiru nia laran maibé muda oituan mai iha oin, sei hahú iha 20 Fevereiru.

Enkontru ne’ebé halao iha salaun D’City Hotel, foka liu-ba osamentu ne’ebé maka sei utiliza ba jogu LFA durante fulan 8 nomós oinsá maka bele buka hamutuk patrosinadór ida ba iha ekipa 8 ne’e.

Jornalista: Xisto Freitas | Editór: Manuel Pinto

Imajen: Enkontru Órgaun Ezekutivu Liga Futebol Amadora. Imajen Mídia LFA.

Sem comentários: