segunda-feira, 15 de janeiro de 2018

Governu Identifika Funsionáriu Kontratadu Balun Nepotizmu

PARTILHAR

GLENO: Funsionáriu kontratatu sira ne’ebé rekruta iha tempu governu anteriór nian, VII Governu Konstitusionál identifika prosesu hirak ne’e barak mosu liu husi ‘dalan’ nepotizmu, ne’ebé haree liu ba familiarizmu no partidarizmu.

Primeiru Ministru, Mari Alkatiri, rekoñese katak períodu liu ba iha ministériu balun rekruta funsionáriu kontratadu maioria husi relasaun familiár no kór partidu polítiku, maibé barak husi sira la hatene halo servisu.

Ne’e duni, Governu hakarak deside atu hapara funsionáriu kontratadu ne’ebé la presiza, atu iha sustentabilidade iha finanseiru nian.

Nia dehan, bainhira funsionáriu kontratadu ne’ebé husi relasaun familiár no kór partidu sira ne’e mak atu hapara, konsekuénsia boot iha ministériu ne’e no ikus liu hakotu relasaun familiár.

“Problema tinan 10 ba kotuk, ita la bolu kontratadu tanba ita presiza, maibé bolu sira tanba ita-nia primu, sobriña. Bolu sira tanba partidu ida ho ita la’ós tanba presiza duni”, tenik nia, Gleno-Ermera, Sesta (12/1).

Xefe Governu haktuir, funsionáriu kontratadu sira ne’e iha família ne’ebé servisu tinan barak ona, ne’ebé atu hapara sira nia kontratu ne’e fó impaktu boot ba uma laran.

Maibé, to’o oras funsionáriu permanente ho kontratudu sira hamutuk ho PNTL inklui FFDTL, Governu ne’e rejista kuaze 70.000-resin, maibé sira ne’e sei laiha problema ho Governu ne’e to’o fulan Juñu ka Jullu.

PM Alkatiri reforsa, funsionáriu kontratadu sira ne’ebé sei presiza estende tan kontratu, maibé sira ne’ebé la presiza tenke hapara.

Tanba ne’e, VII Governu hakarak halo avaliasaun foun ba funsionáriu kontratudu sira, ne’ebé la presiza tenke hapara duni kontratu atu iha balansu servisu iha governasaun nia laran. 

Artur da Luz | Independente
PARTILHAR

Author: verified_user

Publicação luso-timorense sem fins lucrativos

0 comentários: