Alkatiri Orienta Hadi’a Ospitál Nasionál

MAUBARA, (TATOLI) – Primeiru Ministru orienta ona Ministru Saúde ho vice ministru saúde atu hadi’a ospitál nasionál, maibé tenke hamosu uluk klínika periferia nune’e bainhira pasiente moras kmaan sei la-lori ba tan emerjénsia.

“Saúde agora hahú dinámiku foun para atu reorganiza, ha’u koordena ona ho Ministru no Vise Ministru Saúde hodi orienta polítika saúde ba oin. Ospitál nasionál tenke hadi’a, atu hadi’a tenke iha klínika periferia ho kualidade,” Primeiru Ministru, Mari Alkatiri esplika bainhira dadalia ho komunidade Maubara iha Salaun Parokiál Maubara, Sesta (19/01).

Nia dehan, setór Saúde sai prioridade ba programa governu dahituk, atualmente governu sei hadi’a uluk polítika. Meius ida mak, governu haruka ona doutór sira na’in 26 ba foti espesialidade iha nasaun Kuba, no sei ba tan na’in 21.

Polítika refere nu’udar kontinuasaun ida atu eleva kapasidade doutór sira nian, basa iha Timor doutór barak mak hasai kursu doutór jerál servisu ona tinan barak, maibé la kontinua hasai espesialidade.

Enkuantu Timor-Leste nia doutór sira espesializadu hotu ona, pasiente sei la halo tan tratamentu iha rai li’ur.

“Haruka ona ba rai li’ur sai karun liután, satan wainhira ita lahatene ko’alia ema nia lian,” Xefe Governu ne’e kompara. No informa, Ospitál nasionál rasik hahú ona atu hadi’a, liu-liu ho ekipamentu foun para atu halo tratamentu.

Jornalista: Julia Chatarina | Editór: Manuel Pinto

Imajen: Primeiru-Ministru, Marí Alkatiri ho Ministru Saúde, Rui Maria de Araújo. Foto GPM