segunda-feira, 15 de janeiro de 2018

Alkatiri espera Lú Olo bolu lideres parpol


Primeiru Ministru nudar mos Sekretariu Jeral Partidu FRETILIN, Mari Alkatiri, espera iha tempu badak nia laran, Prezidenti Republika (PR) Francisco Guterres Lú Olo, sei bolu lideres partidu politiku (Parpol) hotu atu tuur hamutuk hodi viabiliza Gevernasaun.

“Saida mak Prezidenti Repúblika Francisco Guterres Lú Olo   bele halo, mak bolu ami lideransa tomak   tu’ur hamutuk atu viabiliza Governasaun,” informa Mari Alkatiri, hodi responde jornalista sira iha Munisipiu Ermera, Sesta (12/1/2018).

PM Alkatiri apela ba povu tomak  atu lalika paniku ho situasaun politika ne’ebe mak oras ne’e dau-dauk akontese iha rai laran, tanba hahu loron 23 fulan Janeiru ne’e, Prezidenti Republika  tenke foti desizaun.

Alkatiri hateten, bele iha buat ruma iha 2018 ne’e no sei bele mosu Governu Nasional, mas kontinua FRETILIN mak tenke lidera.

Iha fati hanesan PM Alkatiri mos informa katak, wainhira publiku hatene katak, Bispo Diocese Baucau, Mgr. Basilio do Nascimento, apoia nia hodi sai Primeiru Ministru (PM) ba VII Governu Konstitusional ne’e, iha ona sarani balun atake bispo sira.

“Ha’u la komprende, ha’u tu’ur iha kargu Primeiru Ministru tanba ha’u hetan apoiu husi sosiedade tomak no mos husu opiniaun husi Mgr. Basilio do Nascimento apoiu halo nusa ita bo’ot nia oponiaun mak ultimo determinante ha’u,” hateten Mari Alkatiri.

Nia hatutan, uluk iha tinan 2005, Uma Kreda mobiliza manifestasaun boot kontra Primeiru Governu Konstitusional ne’ebe Alkatiri, tanba deit material Religião la tama iha korikulu obrigatoriu. Momentu neba, tuir Alkatiri, ema hotu basa liman, maibe agora Bispo Basilio apoia VII Governu, komesa iha sarani balun ataka Bispo sira.

“La buat  ida ha’u fila fali ba kadeira PM tanba pedidu mai husi sarani hotu hotu no mos apoiu husi presidente patidu CNRT ne’ebe garante sei viabiliza governu, mas  ikus mai hakuak malu iha Singapura halo ita hakfodak,” hateten Mari Alkatiri.

Mari Alkatiri  kontinua hein nafatin prezidenti partidu CNRT Kay Rala  Xanana Gusmão, maske tuir Alkatiri,  halo konfuzaun tanba top lider promote buat ida halo fali buat seluk.

“ita mos la hatene atu la’o ba ne’ebe durante tinan 10 ha’u kanta mai ita hamutuk agora atu kanta mos ha’u moe fali. Ami fahe malu kanta halo saida imi fahe malu realidade maibe ha’u hanoin agora ho koligaun ne’ebe ukun  atu loke kultura politika foun,” afirma Mari Alkatiri.

Antes ne’e Bispo Diocese Baucau, Mgr, Basilio do Nascimento, klarifika katak,  tuir rejimentu partidu FRETILIN nian wainhira manan iha eleisaun jeral, maka Sekretariu Jeral tenke sai Primeiru Ministru no Igreja apoiu Mari Alkatiri tanba rejimentu fo dalan ba nia atu assume kargu ne’e. ety

GMN TV | Grupo Média Nacional

Sem comentários: