Aniceto Guterres Sei Demite án Rasik

DILI, (TATOLI) – Prezidente Parlamentu Nasionál (PPN), Aniceto Longuinhos Guterres Lopez, hateten nia sei demite án rasik hosi kargu PPN bainhira rezolve Orsamentu Retifikativu.

“Bainhira rezolve tiha Orsamentu Retifikativu, ha’u sei buka dalan atu halo demisaun án rasik, keta hanoin dehan ha’u tauk tún hosi kargu Prezidente Parlamentu Nasionál, povu hatene sé maka kanten ba podér”, katak nia ba jornalista sira iha Palásiu Prezidente Nicolau Lobato, Bairru Pité, kuarta ne’e, hafoin sorumutu ho Xefe Estadu, Francisco Guterres Lú Olo

.

Aniceto haktuir bainhira eleitu iha loron 5 fulan-setembru liu-ba, opozisaun iha ona ajenda atu hatún nia hosi kargu refere.

Tanba ne’e, tuir nia, momentu ne’ebá kedas nia prontu atu tún iha kualker situasaun.

Maibé, Aniceto tenik, hakarak tún ho dignidade no lakohi tún tanba de’it interese polítika opozisaun sira nian hodi ofende ninia dignidade ka reputasaun.

“Proposta destituisaun ne’e rasik ilegál tanba in-ezistente. Nu’udar Prezidente Parlamentu Nasionál, ha’u la rekuñese saida maka Bankada Aliansa Maioria Parlamentár (AMP) tanba la tuir rejimentu Parlamentu”, tenik.

Hatutan tan: “Rejimentu Parlamentu só rekuñese de’it bankada FRETILIN, CNRT, PD, PLP no KHUNTO, laiha bankada AMP”.

“Sé bankada ne’e ilegál, deputadu sira ne’ebé pertense ida ne’e mós ilegál hotu, sira nia rekerimentu ne’e mós ilegál. Tanba ne’e maka ha’u seidauk haruka ba Prezidente Repúblika no Governu”, afirma.

Aniceto mós dehan deputadu sira livre atu halo rekursu ba ajendamentu Mosaun Sensura hasoru Governu no Mosaun Rekursu ba Orsamentu Retifikativu, maibé tenke konsidera mós ninia prosesu ne’ebé nia aprezenta ona ba Tribunál Rekursu ho efeitu suspensivu.

Iha oportunidade ne’e, Aniceto mós hato’o ba Prezidente Repúblika katak hahú kinta aban ba oin nia sei lori Orsamentu Retifikativu ba plenária para hetan diskusaun no aprovasaun.

Nia dehan, antes ne’e, bainhira hatún Orsamentu Retifikativu ba Komisaun sira, opozisaun kompostu bankada CNRT, PLP no KHUNTO boikota ho objetivu atu paraliza funsionamentu Parlamentu Nasionál.

“Hirak ne’e maka kria kondisoens atu hamosu krize institusionál, la’ós ha’u”, tenik.

Jornalista: Xisto Freitas | Editora: Rita Almeida

Imajen: Prezidente Parlamentu Nasionál, Aniceto Longuinhos Guterres Lopez. Imajen Mídia Palásiu PR.