Veteranu TL Hakarak Kadoras Greater Sunrise Mai TL

DILI, (TATOLI) – Porta Vóz Veteranu Timor-Leste Vasco da Gama alias Criado husu atu órgaun soberanu Timor-Leste hasai rezolusaun ida hodi afirma pozisaun katak Kadoras Greater Sunrise tenke mai Timor-Leste, la’ós ba Australia.

“Veteranu no Kombatente Libertasaun Nasionál (VKLN) husu ba órgaun soberania sira hodi tau ás interese nasionál no hasai rezolusaun ida ba ekipa negosiadór kona-ba dada kadoras mai Beaco TL,” Criado deklara liuhosi konferénsia imprensa iha Museum Rezisténsia, ohin.

Nia dehan, “Ami Veteranu no Kombatente Libertasaun Nasionál (VKLN) husu apoiu ba maluk no amigo sira veteranu Australia atu hato’o ba governu Australia hodi dada kadoras mai TL.”

Hakarak mós fó hanoin katak planta Liquefied natural gas (LNG) Timor-Leste fó tiha ona ba Darwin Australia tanba ne’e Greater sunrise tenke mai Timor-Leste.

“Inkondisionálmente ami la aseita hala’o esplorasaun ba Greater Sunrise no la aseita hodi dada kadoras ba Darwin Australia,” Criado afirma.

Nia dehan, “ami funu Nain tomak fó apoiu másimu ba maun boot Kay Rala Xanana Gusmão nu’udar negosiadór xefe ba delimitasaun fronteira Marítima atu lori vitória ida tan hodi dada kadoras mai TL. Ho laran haksolok hato’o kongratusaun órgaun soberania ne’ebé fó ona apoiu tomak ba ekipa negosiadór ne’ebé lidera husi Comandante em Chefe, Kay Rala Xanana Gusmao.”

Nia hein katak luta ba defende fronteira Marítima Timor-Leste nian, veteranu Australia mós sei la taka matan ba Timor-Leste nune’e mós veteranu sira iha internasionál no rejionál ho komunidade internasionál no povu Timor Leste tomak.

Jornalista: Zezito Silva | Editór: Manuel Pinto

Foto: Veteranu timoroan sira ne'ebé partisipa loron ANZAC foin lalais ne'e. Foto mídia Francisco Guterres Lú-Olo