Timor oan sai vítima ba sistema embaixada Portugal; Husu Governu interven lalais

Timor oan sira ne’ebé trata Bilhete Identidade  (BI) hodi sai sidadaun Portugueza atu bele ba servisu iha rai liur hanesan Inglaterra, Irlanda no seluk tan, sai vítima ba sistema embaixada Portugal iha Timor Leste (TL), tanba maske prosesu hotu tenki selu ho osan, maibé dokumentu sira ne’e prosesa kleur los.

Timor oan ne’ebé trata BI Portugal, Laurentino Tavares, hateten, sira hein tinan tolu ona, maibé sira nia dokumentu seidauk sai.

“Ami halo protesta, tanba ami mai vistu iha ne’e ho dokumentus ne’ebé mak kompletu, tuir kritéria embaixada Portugal nian,   inklui mós selu taxa no selu mós administrasaun, nune’e sira promete dehan, dokumentus sira ne’e prosesu durante fulan 6 deit remata ona, maibé realidade ne’ebé mak iha, tinan 3 no balun balu to’o tinan 5 ona. Tanba ne’e mak ami mai halo protesta, depois ami mai eziji bebeik, maibé sira dehan semana rua nia laran bele hotu, bosok ami tun sa’e deit rezultadu laiha,” hateten Laurentino Tavares ba GMN iha edifisiu Embaixada Portugal Colmera Dili, Segunda (27/11).

Nia hatutan, Timor oan sira ne’ebé mak servisu iha embaixada Portugal nian ne’e, mak halo pendente sira-nia dokumentus, atu Timor oan sira ne’ebé trata BI Portugal nian ne’e bele selu taxa bebeik.

Iha fatin hanesan Elsa Paulina mós informa, sira ezije ba embaixada Portugal atu hetan sira-nia direitu.

“Ami mai eziji ami-nia direitu, tanba ami-nia narativa, ami-nia BI kuaze barak mak trata iha 2014, to’o agora pendente.  Kunadu pendente ona hanesan ne’e, ami tenki multa US$ 120,  selu nafatin taxa, depois sira hateten katak, fulan 6 mak mai fali, maibé  ami mai sistema foun fali ona.  Tanba ne’e ami konfuzaun los ho sistema ne’e, tanba ninia prosesu normal ne’e mak tinan 1, ita-nia narativa tenki mai ona,”afirma nia.

Tanba n’e, nia husu ba Governu atu interven lalais, hodi embaixada Portugal fó klarifikasaun lolos ba sistema sira nian, atu nune’e Timor oan sira labele sai vítima.

Ba preokupasaun, GMN tenta konfirma ho Embaixador Portugal ba Timor-Leste, maibe la konsege tamba okupadu. Aba

GMN – Grupo Media Nacional