quinta-feira, 30 de novembro de 2017

Referendu Apoiu Programa Lahanesan Referendu iha Konstituisaun

DILI, (TATOLI) – Primeiru-Ministru, Marí Alkatiri, hateten referendu ne’ebé maka sira halo ne’e la’ós referendu ne’ebé maka hakerek iha konstituisaun.

Xefe Governu esklarese referendu ne’e atu husu populasaun sira nia asinatura ba programa governu konstitusionál dahituk no realidade hatudu populasaun rihun ba rihun maka hato’o ona sira nia deklarasaun hodi apoiu.

“Ami halo daudauk ona no ema ne’ebé asina barak tebes. Referendu ne’ebé ha’u ko’alia ne’e la’ós referendu atu ba vota hanesan hakerek ona iha Konstituisaun”, katak Xefe Ezekutivu ba jornalista sira iha Palásiu Prezidente Nicolau Lobato, Bairru Pité, hafoin husu ninia komentáriu kona-ba progresu referendu ba programa governu.

Xefe Governu informa nia ko’alia referendu ho kapasidade hanesan Sekretáriu Jerál Partidu FRETILIN no realsa laiha ema ida bele bandu atu ko’alia polítika iha fora oras serbisu nian.

Kona-ba membru partidu balun kestiona Proklamasaun Independénsia 28 Novembru 1975, líder istóriku ne’e hatán istória independénsia Timor-Leste nia hún maka Proklamasaun Independénsia 28 Novembru 1975, tan ne’e, sé maka la rekuñese istória importante ne’e bele ba buka rai seluk hodi hela.

“Sé maka la rekuñese ida ne’e, nia rain maka ida ne’ebé. Di’ak liu ba buka rai seluk hodi hela. Timor-Leste la’ós pretense ba sira”, haklaken.

Jornalista: Xisto Freitas | Editora: Rita Almeida

Foto: Primeiru-Ministru, Marí Alkatiri, ko'alia ba jornalista sira hafoin hasoru Prezidente Repúblika, Francisco Guterres Lú Olo, iha Palásiu Prezidente Nicolau Lobato Bairo Pité, ohin. Foto mídia PR

Sem comentários: