La Bele Haksesu Buat Ne’ebé La Fó Rezultadu

KOVALIMA, (TATOLI) – Xefe Estadu Timor-Leste husu ba timoroan hotu atu la bele hasesuk buat ne’ebé mak la fó rezultadu di’ak ba povu atu harii futuru ida di’ak liu tan.

“Ha’u apela ba hotu-hotu atu labele hamenus esperansa povu nian no halakon oportunidade povu nian ho haksesuk sira ne’ebé la fó rezultadu di’ak ba povu” Prezidente Repúblika Francisco Guterres Lu Olo apela, iha selebrasaun 28 Novembru, Tersa (28/11).

Tuir nia timoroan sira tenke hamutuk iha objetivu ida tuir prinsípiu no valór, ne’ebé eroi sira hanesan Nikolau dos Reis Lobato no Nino Konis Santana husik hela ba Timor.

“Respeita ema hotu-sidadaun sira, partidu sira no organizasaun sosiedade sivíl nian. Maibé ha’u nia hahalok no inisiativa sei serve de’it povu no ha’u sei hakoruk de’it ba Konstituisaun RDTL,” Lu Olo fó sai nia hahalok rasik.

Nia husu atu konta ho nia nafatin hodi servisu hamutuk atu hatudu ba mundu katak Estadu Timor-Leste nia prioridade mak harii moris di’ak liu, hadi’a povu nia kondisaun moris no tane aas povu.

Jornalista: Zezito Silva | Editór: Manuel Pinto

Foto: Prezidente Republika, Francisco Guterres Lu Olo