sábado, 18 de novembro de 2017

Kastigu Korporál Hasoru Labarik Ás

DILI, (TATOLI) - Komisária Komisaun Nasionál Direitu Labarik, Maria Barreto hateten kazu kastigu korporál ka violénsia fíziku hasoru labarik sira ho númeru ás (kuaze pursentu 65) ne´ebé mai hosi família, eskola no fatin públiku.

Nia esplika dadus violénsia ne´e mai hosi organizasaun sira ne´ebé maka fó atendementu ba labarik sira. Enkuantu, Komisaun Nasionál Direitu Labarik oras ne´e dezenvolve hela baze dadus rasik atu públiku bele asesu dadus.

“Komisaun Nasionál Direitu Labarik dezenvolve hela baze dadus nasionál atu bele fó sai dadus efetivu ba públiku nune´e públiku bele asesu,” Barreto relata informasaun ne´e ba jornalista sira iha Palásiu Prezidente Nicolau Lobato, Bairru Pité, Dili, kinta horsehik, hafoin soru-mutu ho Xefe Estadu Francisco Guterres Lú Olo.

Iha biban ne´e, Komisária informa, Komisaun Nasionál Direitu Labarik haruka ona Lei Justisa Juvenil ba Parlamentu Nasionál atu deskuti. Lei ne´e, nia esplika, ne´e fahe ba rua. Ida, Lei Rejime Epesiál no, rua, Lei Titulár Edukativu Minor.

Maria esklarese katak lei ne´e ko´alia kona-ba tipu sira atu proteje labarik sira ho idade 16 to´o 21 nomós bandu violénsia hasoru labarik sira.

Jornalista: Xisto Freitas | Editór: Manuel Pinto

Foto: Komisária Komisaun Nasionál Direitu Labarik, Maria Barreto, bainhira soru-mutu ho Prezidente Repúblika, Francisco Guterres Lú Olo iha Palásiu Prezidente Nicolau Lobato. Imajen Mídia Palásiu PR.

Sem comentários: