Aeroportu Bali sei loke fali hafoin mudansa hosi diresaun sinza vulkániku nian

Aeroportu internasional Bali nian sei loke fali, hafoin taka loron tolu, tanba sinza ne'ebé sai hosi vulkaun Agung muda ona diresaun, fó sai hosi autoridade iha loron-kuarta ne'e. 

Porta-vós hosi aeroportu Ngurah Rai, Aroe Ahsanurrohim, fó sai antes katak espasu aéreu sei loke fali, no aponta katak bele akontese iha tuku 15:00 (oras lokal).

Tuir responsável ne'e, sinza vulkániku desloka ona ba súl ho sudeste, halo nune'e kalohan lahó sinza iha aeroportu, permiti nune'e posibilidade hodi aviaun sira halo deslokasaun no bele tuun.

Aeroportu Ngurah Rai taka iha loron-segunda dadeer, ho kanselamentu ba semo oioin nune'e afeta ba pasajeiru millaun resin.

Prezidente Indonézia nian, Joko “Jokowi” Widodo, ordena ba ministériu tomak ho ajénsia tomak, nune'e mós ba militar sira ho polísia, hodi ajuda governu hosi illa turístika Bali nian hodi hasoru situasaun ne'e.

Iha loron rua dahuluk bainhira taka, kansela ona semo kuaze 900 resin iha aeroportu internasional Ngurah Rai - semo 445 iha loron-segunda no semo 443 iha loron-tersa -, hamutuk tan ho ligasaun aéreu 31 ne'ebé anuladu iha illa Lombok, iha leste illa Bali nian, ne'ebé afeta ona pasajeiru hamutuk rihun 100 resin.

Diretor informasaun hosi Ajénsia Nasional ba Jestaun Dezastre sira nian (BNBP, iha lian indonéziu), Sutopo Purwo Nugroho, indika ona, liuhosi rede sosial sira, katak kalohan sinza nian to'o ona aas metru 7.600 hosi nível tasi nian.

Pelumenus aldeia hamutuk 22 ne'ebé besik iha vulkaun maka afetadu ho sinza ne'ebé maka hahú iha diresaun sudueste.

Sentru Vulkanolojia no Mitigasaun hosi Perigu Jeolójiku sira aumenta ona, iha loron-segunda, nível alerta máximu ba erupsaun, aumenta perímetru seguransa nian to'o kilómetru sanulu resin besik iha kratera no hatete ba risku erupsaun boot ida.

Autoridade indonéziu sira haruka hasai ona ema hamutuk rihun 100 ne'ebé maka hela iha zona perigu nian, ne'ebé kuaze rihun 40 rejista ona iha fatin refújiu ne'ebé situa iha pontu oioin iha illa turístika ne'e, maski iha populasaun balun maka lakohi sai hosi sira nia uma.

Erupsaun ikus hosi vulkaun Agung, ne'ebé akontese iha tinan 1963 no prolonga to'o kuaze tinan ida, halo ona ema na'in 1.100 resin mate.

Bali hanesan destinu turístiku prinsipal iha Indonézia, ho alfuénsia tinan-tinan hamutuk millaun 5,4 ba vizitante estranjeiru sira, haktuir hosi informasaun ofisial.

Arkipélagu Indonézia nian situa iha "Ring of Fire" hosi Pasífiku, zona ida ho atividade sísmiku ho vulkániku maka'as ne'ebé rejista, tinan-tinan, rai-nakdoko millaun resin, maioria hanesan moderadu.

SAPO TL ho Lusa