quarta-feira, 11 de outubro de 2017

Taur Manifesta Preokupasaun Ba Xanana

DILI, (TATOLI) - Prezidente Partidu Libertasaun Popular (PLP), Taur Matan Ruak rekoñese katak, nia ho Xanana Gusmão halo ona kontaktu ba malu maski liu hosi telefone de’it.

Iha komunikasaun entre lider opozisaun Nain rua ne’e, Taur Matan Ruak manifesta nia preokupasaun ba Prezidente Partidu CNRT, Kay Rala Xanana Gusmão kona-bá pozisaun Fretilín nian.

“Ami Nain rua ko’alia iha telefone, ha’u manifesta ha’u nia preokupasaun ba frajilidade, inkonsisténsia Fretilín nian,” Taur Matan Ruak fó sai ba Jornalista sira iha nia hela fatin, Metiaut, ohin.

Taur Matan Ruak dehan, tentativa koligasaun entre Fretilín ho PLP para iha dalan klaran tanba iha prosesu negosiasaun partidu rua ne’e la entende malu kona-bá modalidade governasaun no pozisaun iha Parlamentu Nasionál.


Modalidade governasaun ne’ebé PLP prefere mak koligasaun, maibé Fretilín aprezenta modalidade tolu, koligasaun, insidénsia parlamentár, inkluzaun.

Iha Parte polítika, PLP kontra konsentrasaun podér, konsentrasaun rekursu no konsentrasaun priviléjiu, defende desentralizasaun kompeténsia no desentralizasaun governasaun ho métodu dezenvolvimentu país Nian tenke ekilibradu, fó prioridade ba nesesidade bázika duke projetu boot ne’ebé nia rétornu duvidozu inklui boa governasaun.

“Modalidade governasaun, polítika, programas, pozisaun iha Parlamentu. Saida mak ami konsidera hanesan pontu krítiku ? ami hetan pontu krítiku rua; ida modalidade governasaun, ha’u hatete Fretilín nia pozisaun la inspira ha’u nia partidu,” Taur Matan Ruak realsa.

Hodi hatutan, “ha’u tuir ema ida ne’ebé la hatene saida mak nia hakarak los, ne’e la bele.”

Entertantu iha negosiasaun PLP la apoia Fretilín atu okupa hotu pozisaun sira iha Parlamentu, maibé apoia Fretilín atu asume knaar nu’udar Primeiru Ministru e iha governu PLP bele sai elementu sekundáriu de’it.

“Hakarak hatete ba públiku katak, kulpa la’ós ami nian. Inisiativa rotura ne’e fretilín nian. Tanba ne’e sira la bele fó sala ba ami. Agradese ba Fretilín tanba ami diskute oi tuan hodi koñese malu,” Taur hato’o.

Jornalista: Rafy Belo | Editór: Manuel Pinto

Foto: Prezidente Partidu Libertasaun Popular (PLP), Taur Matan Ruak FOTO: Antonio Goncalves

Sem comentários: