Primeiru-ministru hatete katak ezijénsia hosi opozisaun kona-ba programa "halakon tradisaun"

Primeiru-ministru timoroan hatete iha loron-tersa ne'e katak la entende krítika hosi opozisaun ba formatu hosi programa Ezekutivu nian no ezijénsia sira ba detalle sira, ne'ebé "halakon tradisaun" hosi Governu neen dahuluk, hodi kompromete "klarifika buat hotu".

"Ha'u haree programa sira hosi Governu dahuluk to'o Governu daneen. Ezijénsia sira hosi señór deputadu sira iha lejitimidade, maibé la halo parte hosi tradisaun ezekusaun ba programa nian. Kultura polítika no governativu hosi governu dahuluk to'o governu daneen maka halo programa hanesan ne'e", afirma hosi Mari Alkatiri.

"Agora sira halo ezijénsia barak ba Governu dahitu. Ha'u la komprende", nia konsidera, iha loron daruak hosi debate ba programa Governu nian iha Parlamentu Nasional.

Iha kauza maka interpretasaun hosi artigu 108 hosi Konstituisaun, ne'ebé defini oinsá maka tenki halo programa Governu nian, dokumentu ida ne'ebé "tenki inklui objetivu sira no tareda sira ne'ebé maka hakarak hala'o, medida sira ne'ebé maka sei hili no orientasaun polítika prinsipal sira ne'ebé maka hakarak halo tuir iha domíniu sira hosi atividade governamental nian".

Opozisaun insisti nafatin, dezde hahú debate, iha loron-segunda, kona-ba saida maka sira konsidera hanesan ladún klaru kona-ba medida balun ne'ebé maka fó sai iha programa, ho falta esplikasaun kona-ba oinsá maka Mari Alkatiri nia governu sei hala'o asaun ne'ebé fó sai.

Bainhira Lusa insisti hodi avalia komentáriu krítiku sira hosi Congresso Nacional da Reconstrução Timorense (CNRT, forsa opozisaun boot no ne'ebé maka lidera Governu ikus) kona-ba polítika ne'ebé maka fó sai iha programa, Mari Alkatiri hatete katak testu hanesan aposta ida iha "evolusaun ba kontinuidade" hosi asaun ne'ebé maka halo iha tinan ikus ne'e.

"Labele hanesan kontinuasaun hodi marka etapa. Governu tenki iha korajen hodi hatán ba nesesidade sira", nia afirma ona.

"Programa tomak hanesan kontinuasaun. Laiha tentativa ida hodi halo revolusaun sira, laiha revolusaun", nia hatete no konsidera katak, tanba ne'e, krítika sira hosi CNRT "laiha sentidu ida".

Mari Alkatiri ko'alia hafoin iha kestaun oioin hosi deputadu sira opozisaun nian kona-ba aspetu oioin sira hanesan polítika ambiental, reforma judisial, modelu fiskal, edukasaun ho polítika juventude nian, no seluk tan.

Hanesan ezemplu, kona-ba ambiente, Mari Alkatiri insisti katak Governu sei halo buat hotu "ne'ebé bele no nesesáriu" hodi hametin polítika ambiental sira iha Timor-Leste ho "vizaun transversal" ida, fó ezemplu ba reforma sira ne'ebé nia halo bainhira kaer knaar nu'udar responsável hosi Rejiaun Administrativu Espesial Oecusse-Ambeno nian, enklave timoroan nian iha teritóriu indonéziu.

Kona-ba futuru hosi Sentru Formasaun Jurídiku no aumentu hosi rede tribunal sira nian, Mari Alkatiri subliña ona katak Governu tenki hanesan "ambisiozu" no tenta hatán ba ezijénsia sira hosi realidade, se la'e polítika sira dezenvolvimentu nian laiha susesu.

Sentru tenki hanesan nível daruak formasaun nian, haree ba moris profisional no ba espesializasaun hosi majistradu sira, buka ajuda hodi hatán ba "dezenvolvimentu lalais ne'ebé maka labele evita", nia destaka.

"Ita tenki organiza hodi hatán ba ezijénsia foun sira. Bainhira ita trava dezenvolvimentu, ita laiha kondisaun hodi kontinua prosesu dezenvolvimentu nian", nia hatete ba deputadu sira.

"Ita labele para. Bainhira sira iha proposta ha'u preparadu hodi diskuti, maibé ita labele para. Bainhira ita dezenvolve munisípiu sira ita sei presiza liután tribunal sira, bainhira ita aselera dezenvolvimentu ekonómiku, ita tenki diversifika no aumenta ita nia asaun", nia hatete.

Hanesan ezemplu, primeiru-ministru timoroan haktuir importánsia hosi tribunal arbitrajen ida hanesan hakat ida hodi "fó kredibilidade" ba ambiente negósiu sira iha nasaun no tulun hametin investimentu externu.

Mari Alkatiri hatete kata, iha área justisa, hala'o daudaun ajenda ida reforma nian, maibé estudu sira ho rekomendasaun sira "agora labele para", tenki avansa ho aplikasaun.

Programa Governu nian "la'ós hanesan dokumentu ida hosi intensaun sira", maibé testu ida "ho vontade no konviksaun", nia afirma. Maibé, bainhira "opozisaun hatete katak laiha sentidu polítiku, laiha sentidu ekonómiku, laiha sentidu literáriu" entaun "buat hotu mamuk" no "karik la ezisti".

Alkatiri afirma ona katak prosesu deskonsentrasaun ka desentralizasaun administrativu "sei kontinua", no fó hanoin katak estudu dahuluk sira kona-ba asuntu ne'e halo bainhira nia lidera Governu dahuluk. Importante maka "avalia no hadi'a nafatin", nia subliña.

"Halo nafatin reajustamentu. Iha tempu funu nian, ita halo beibeik ona reajustamentu. Prosesu husu saida maka ita iha, iha momentu ida-idak, hodi prepara halo nafatin koresaun sira. Prosesu polítiku tenki rekoñese dinámika sosial. Hadi'a la signifika nega méritu ba buat sira ne'ebé halo ona. Ita tenki iha kapasidade hodi komprende katak iha momentu ida-idak bele halo ajustamentu", nia konsidera.

Iha reasaun ida ba komentáriu katak ho programa Governu hakarak "konfiansa ida", Alkatiri afirma katak la buka "xeke" sira, maibé buka "entendimentu, komprensaun, análize objetivu hosi situasaun" no "akordu lahó limitasaun".

Primeiru-ministru timoroan garanti ona katak estrutura hosi Governu nian kria "poupa millaun resin, tinan-tinan, ba orsamentu Estadu".

Ezekutivu hakarak halo gastu sira "sai efisiente liu no efikás liu", hametin relasaun ho instituisaun internasional sira hodi hetan apoiu adisional sira no hetan reseita alternativu sira, nia hatutan.

SAPO TL ho Lusa