Nurima: Politika Laos Inimigu ba Malu

THETIMOR-NEWS.com, DILI – Deputada Bankada FRETILIN Nurima Ribeiro Alkatiri hatete, politiku laos inimigu ba malu, maibe komunikasaun importante liu-liu lider partidu sira tanba intrese nasional ba povu nia moris bo’ot liu.

“Ita lalos inimigu ba malu iha politiku maibe komunikasaun entre lider masimu sira no partidus politiku sira importante tebes. lalos dehan programa sira la liu ona ne’ebe ita la koalia ba malu. Ne’e lalos. ita tenke iha komunikasaun ba mlu nafatin tanba intrese nasional ba povu bo’ot liu,” dehan deputada Nurima ba THETIMOR-NEWS iha edifisiu Parlamentu Nasional (PN), Kinta (26/10/2017).

Maski daudaun ne’e, Aliansa Maioria Palamentar (AMP) liu husi konferensia imprensa ne’ebe halao iha salaun bankada CNRT foin lalais ne’e hatete katak, Primeiru Ministro (PM) Dr. Mari Alkatiri tun ba baze atu halo referendum no kontra Konstituisaun RDTL.

Tanba ne’e, deputada Nurima esplika, “Sira kompriende sala ona, tamba FRETILIN ou Sekretariu Jeral FRETILIN tun ba baze seidauk atu halo referendum, tun agora daudaun atu halo esplikasaun no konsolidasaun ba saida mak iha programa nia laran no tanba sa mak programa ne’e la liu. Ida ne’e mak servisu ne’ebe FRETILIN hamutuk ho PD halo hela,” dehan deputada Nurima.

Lider Jerasaun founn ne’e hatutan, atu halo referendum hanesan ideia ida ne’ebe mosu relasiona ho opozisaun hatete katak sira nia parte maioria hodi vota kontra programa ne’ebe mak hato husi VII Governo iha semana kotuk.

“Atu halo referendum hanesan ideia ida ne’ebe mosu tanba opozisaun dehan sira maioria liu iha PN la husik liu, tanba hare ba programa ne’e intrese povu nian diak liu ami nia hanoin intrega ba povu rasik mak deside sira rasik hakarak programa ne’e ka lae,” dehan deputada Jerasaun foun ne’e.

Nia hatutan, Partidu rua iha governu iha direitu atu halo esplikasaun ba sira nia militante no eleitores sira kona ba programa ne’ebe governu halo. Tanba tuir sira programa ne’ebe iha responde duni ba povu nia nesisidade.

“Programa ne’e, la liu iha PN ne’e tanba maioria iha ne’e mak la konkorda, maibe sira rasik la fo argumentu ne’ebe forte kona ba programa ne’e hodi bele hadia, entaun ami nia hanoin povu mak deside deit ona,” dehan deputada Nurima.

Iha sori seluk, Komunidade Cristovão Gonsalves hanesan Vendedor iha Merkadu Manleuan husu ba nai ulun sira atu tur hamutuk hodi bele koalia ho laran malirin nune’e bele lori nasaun ne’e baoin no povu mos bele moris hakmatek.

“Ami povu so husu deit ba maun bo’ot sira tenke tur hamutuk hodi kolaia didiak ba malu atu oinsa bele lori nasaun ne’e ba oin, nune’e ami povu sira mos bele halo ami nia aktividade ho hakmatek,” dehan Cristovão.

Hortencio Sanchez | Editóra: Agida dos Santos

Foto: Deputada bankada FRETILIN, Nurima Ribeiro Alkatiri. Photo: TTN/Hortencio Sanchez