terça-feira, 31 de outubro de 2017

MUTL Prefere Harii Governu Unidade Nasionál

DILI, (TATOLI) – Movimentu Universitáriu Timor-Leste (MUTL) prefere harii Governu Unidade Nasionál nu’udar solusaun atu rezolve problema iha rai laran.

“MUTL nia hanoin maka líder nasionál sira harii konsensu nasionál ida no hosi konsensu nasionál ne’e maka bele hamosu Governasaun Unidade Nasionál para asegura ita nia Estadu, tanba ita haree katak informasaun sira tún ba baze halo povu ne’e pániku”, Portavóz MUTL, Noe Bernadino Ximenes, ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin enkontru ho Prezidente Repúblika, Francisco Guterres Lú Olo kona-ba situasaun polítika iha Timor ne’ebé seidauk hetan konsensu entre líder nasionál sira hodi loke dalan ba dezenvolvimentu.

Tuir nia, eleisaun antisipada sei la fó solusaun ba Governu foun tanba rezultadu eleisaun sei la diferente ho rezultadu eleisaun iha 22 jullu liu-ba. Ne’e duni, hatutan, kria konsensu nasionál ida hodi eleje ema importante sira para inklui iha Governu Unidade Nasionál.


Iha biban ne’e, Prezidente Repúblika hameno ba povu tomak, liu-liu ba joven sira atu labele pániku tanba tempu badak Xefe Estadu sei túr hamutuk ho líder nasionál sira atu hakotu problema iha nasaun ne’e.

“Hein katak inan aman sira iha foho labele pániku ho situasaun sira ne’e. Ita hala’o de’it ita nia atividade hanesan baibain. Husik situasaun sira ne’e ita nia líder rezisténsia sira maka rezolve”, portavóz MUTL haklaken. 

Jornalista: Xisto Freitas | Editora: Rita Almeida

Foto: Reprezentante MUTL sira bainhira dadalia ho jornalista sira iha Palásiu Prezidente Nicolau Lobato, tersa ne'e. Imajen Ajénsia TATOLI/Xisto Freitas

Sem comentários: