L7 konsidera opozisaun la iha nasionalismu “Taur bele ba PM”

Segundu Komandante FALINTIL Região III, Cornelio da C. Gama ‘L7’, konsidera deputado sira opozisaun la iha sentimentu nasionalismu, tanba deskute deit politika no la rona malu hodi deskute povu nia moris.

“Hau hare iha Parlamentu Nasional, politiku maka barak liu, nasionalismu laiha,” hateten L7 ba GMN iha Edefisiu Conselho Kombantentis Libertasaun Nasional Munisipiu Dili, Tersa (24/10/2017).

L7 reafirma katak, kuandu opozisaun sira iha nasionalismu, sira tenke tuir malu, respeita malu, obedese malu, maibe politiku deit ne’ebe sira deskute laiha hun laiha dikin no la hanoin ba povu nia diak.

L7 hateten, se opozisaun sira iha nasionalismu karik, sira fiar malu, respeita malu hodi deskute programa lori moris diak ba povu, no dezenvolve diak liu tan nasaun iha tinan lima nia laran.

“Sira nia hakarak halo eleisaun antisipada, eleisaun antesipa ne’e povu nia hanoin iha tiha ona, bele hili ou la hili no bele tur nonok hare deit, kuandu akontese nasaun tun, se tun entaun ami veteranus mantein pozisaun, ne’ebe imi tur estuda no analiza, no entrega mai ami FALINTIL ukun, loron ida ka fulan ida,” deklara L7.

Sobre eleisaun antisipada, L7 dehan, veteranus la’os ema politiku ne’ebe sira sei fo rezultadu bainhira akontese eleisaun antisipada.

“Kona ba eleisaun antisipada, ami la’os ema politiku ne’ebe ami haree tuir deit sira halo kampaña, maun Xanana, Taur, Lu Olo no Mari Alkatiri, FRETILIN maka fahe buat hot-hotu, ne’ebe hau husu sira tenke hamutuk, lolos ne’e maka ne’e, maun Lu Olo prezidenti ona, Maun Xanana halo dezenvolvimentu, maun Taur ba Primeiru Ministru kuandu fahe hanesan ne’e problema laiha,” afirma L7.

Veteranu ne’e rekomenda ba politiku sira katak, nudar ema matenek tenke hanoin no néon ida hodi nune’e bele rezolve problema povu nian.

“Hau rekomenda ba imi (red-PN) katak, imi matenek hasai kursu S1, S2 la’os hanesan ami sira ne’e halo funu nunka eskola, se imi S2 hanoin povu nia terus no susar no tenke tur iha hanoin no néon ida deit para ukun to’o tinan lima, kuandu sala tenke kritika, los hare ba oin,” hateten L7.

Programa VII Governu nian debate iha uma fukun Parlamentu Nasional semana kotuk, maibe la passa, tanba mosu mosaun de rezeinsaun husi bankadas opozisaun sira. Maibe VII Governu sei hodi hikas programa ne’e ba PN hodi deskute ba daruak, tanba konstituisaun fo dalan, dadaun ne’e Governu hare no deskute diak liu tan hodi prepara tuir ejijensia PN nian, Governu iha loron tolu nulu hodi hare hikas antes hodi ba aprejenta iha PN. Mia

GMN TV – Grupu Media Nacional