segunda-feira, 16 de outubro de 2017

Justisa Ba Deputadu Vicente sei Inserteza

DILI: Prosesu justisa ba Deputadu CNRT, Vicente Guterres, iha inserteza nia laran. Karta pedidu alterasaun imunidade deputadu nian, Parlamentu Nasionál haruka fila-fali ona ba Tribunál.

Parlamentu Nasionál haruka fila karta ne’e tanba la dirije direita ba Prezidente Parlamentu Nasionál, maibé haruka fali ba Vise-Prezidente.

Portavós PN, Lídia Ana Belo hatete, korrespondénsia imunidade Deputadu Vicente Guterres ne’e prosedimentu administrasaun ne’e la loos.

Tanba ne’e, parlamentu nasionál haruka fila ba Tribunál Rekursu atu halo fali korrespondénsia foun tuir ierarkia órgaun soberanu ne’e nian.

Nia hatutan, karta ne’e kuandu direta mai Prezidente PN, mak sei konsidera hodi despaxa ba iha Komisaun A PN, atu bele halo diskusaun fó sira nia pareser hodi lori mai plenária fó votu depois hasai imunidade.

“Ami rona husi Tribunál Rekursu katak, prosesu ne’e sira ne’e fallansu tékniku”, dehan Lídia, iha Uma Fukun PN, Sesta (13/10).

Nia hatutan, agora daudaun atu tama ona ba diskusaun programa governu nian. Tanba ne’e, iha semana ne’e PN nia-ajenda foka liu ba diskusaun programa, laiha tempu atu haree fali ba asuntu seluk.

Maski nune’e, durante diskusaun ne’e la’o Tribunál bele halo nafatin korrespondénsia ba Parlamentu Nasionál tuir prosedimentu ne’ebé iha.

Jacinto Xavier | Independente

Sem comentários: