sexta-feira, 27 de outubro de 2017

Igualdade Jéneru Sai Hanesan Sentru Ba Prosesu

LIKISÁ, (TATOLI) – Sekretaria Estadu Igualdade Jéneru no Inkluzaun Sosiál, Laura Menezes Lopes, husu ba liña ministerial sira atu konsidera kestaun igualdade jéneru, sai hanesan sentru ba prosesu planeamentu, define programa no orsamentu.

“Normalmente ita bolu orsamentu tenke sensivel ba jéneru hodi responde nesesidade feto sira,” , Laura Menezes Lopes  hato’o iha nia diskursu relasiona ho loron internasionál feto rural ne’ebé selebra iha Suku Watu-Vou, Postu Maubara no Munisípiu Likisá, Kinta (27/10).

Laura fó hanoin, iha tinan 2016 governu hatuur ona deklarasaun Maubesi katak, atu asegura polítika no programa iha nia implementasaun liuhosi hakabit maluk feton sira iha área rural liuhosi setór edukasaun, saúde no agrikultura.

Ho ida ne’e governu atuál husu atu servisu liña ministerial sira kontinua koopera malu nafatin hodi atu lori dezenvolvimentu ne’ebé di’ak ba sosiedade liuliu ba maluk feton sira iha área rural no urbana.


Ba feton maluk sira,  kontinua koopera nafatin ho governu ba implementasaun programa nesesáriu ba inan feton sira hodi hakabit ekonomia feto rural hodi haforsa dezenvolvimentu nasionál.

Nu’udar governante Laura promete sei konsentra atu asegura hodi integra nafatin perspetiva igualdade jéneru liuhosi liña ministerial sira hodi kontinua implementa programa hirak ne’e dezde hosi governu dahuluk to’o ohin loron no sei kontinua nafatin.

Kna’ar seluk ida mak, hakabit maluk vulneravel sira, aposta makas iha hakabit ekonomia feto no setór seluk basa feto Timor-Leste iha pilár importante ba dezenvolvimentu nasionál ho sustentável ba jerasaun tuir mai.

Nune’e mak sétimu governu sei kontinua nafatin hosi aliserse ne’ebé hatuur ona iha planu estratéjiku dezenvolvimentu nasionál atu to’o iha tinan 2030 Timor-Leste bele hetan sosiedade ne’ebé moris inkluzivu liu no fó fatin liu tan ba kultura foun igualdade jéneru.

“Ita tuir hela jornada ne’e hodi halo advokasia hosi nivel ministériu no iha sosiedade,” nia salienta.

“Enkuantu, tempu tuir mai ita sei halo kapasitasaun iha área jestaun negósiu, akontabilidade, manajementu, lideransa atu kontinua hakabit nafatin maluk feto sira nia abilidade.”

Jornalista: Zezito Silva | Editór: Manuel Pinto

Foto: Sekretaria Estadu Igualdade Jéneru no Inkluzaun Sosiál, Laura Menezes Lopes. Foto Facebook

Sem comentários: