Grupo Rezistensia Husu Xanana-Alkatiri Cs Dialog

DILI, (TATOLI) - Reprezentante Organizasaun massa Rezisténsia, OJETIL, RENETIL, OPJELATIL, Santo António, Sagrada Família no seluk tan ne´ebé hamahon án iha grupu Junta das Organizações da Resistência Para a Defesa da Soberania Nacional preokupa ho situasaun polítika iha rai laran, tanba ne’e husu Prezidente Repúblika atu reúne dialog entre lider sira hanesan Xanana, Alkatiri, Taur, no seluk tan.

Ezijénsia hato’o liuhosi konferénsia imprensa ne´ebé hala´o iha sede Komité 12 Novembru Balide, Dili, Sesta, Ohin.

Iha konferénsia ne’e organizasaun massa rezisténsia hato’o nia ezijénsia sira hanesan tuir mai ne´e;

Husu ba Prezidente Repúblika (PR), Dr. Francisco Guterres Lú Olo atu uza nia kompeténsia tuir Konstituisaun haruka hodi konvoka lider nasionál na´in tolu hanesan Xanana Gusmão, Marí Alkatiri no Taur Matan Ruak, ulun boot partidu  PD no KHUNTO nune´e tuur hamutuk ho Prezidente Repúblika hodi buka solusaun ba situasaun polítika iha rai laran.

Husu líder na´in tolu (Xanana Gusmão, Marí Alkatiri no Taur Matan Ruak ), nu’udar ulun boot ba partidu boot tolu no ulun boot iha Timor-Leste, atu túr hamutuk hodi buka dalan para fó solusaun ba naksalak ne’ebé mosu.

Loke laran no fó oin ba malu no husu lider partidu 5 iha asentu Parlamentár hodi haree hamutuk, haree lisuk no didi’ak programa ne’ebé pro-povu hodi kumpre promesa sira ne’ebé uluk halo hamutuk ho Povu Maubere, nune’e bele ultrapasa tiha situasaun “impasse” polítika no kumpre Tramites Constitucionais no halibur malu iha diálogu ho bom sensu para lori estabilidade no moris di´ak ba povu. Basa povu liuhusi eleisaun parlamentár 2017 fó votus konfiansa ho mensajen ne’ebé momoos.

Nu’udar ema ne’ebé barak ka oi tuan uluk kontribui mós ba prosesu luta ba Ukun Rasik An Timor-Leste nian, reprezentante organizasaun hirak ne´e ho laran triste tebe-tebes dirije ba reprezentante povu nian iha Uma Fukun Parlamentu Nasionál, katak Povu Maubere presiza moris di´ak no saudavel, tan ne’e hatuur interese nasionál ás liu interese grupu ka partidu nian, basá programa ne’e Pro-Povu ka atu hadi´a povu nia moris.

Tranzisaun Jérasionál ida ne’e sei la fó folin, bainhira Lideransa Nasionál sira la hatudu NEON MATENEK, sei la fó folin bainhira la hamutuk, sei la fó folin bainhira iha públiku nia oin ita hakuak malu ho hamnasa, maibé iha kotuk hatún malu no ne´e hahalok ida ne’ebé sei tranzmite mós hosi jerasaun ba jerasaun.

Reprezentante hirak ne´e lakohi tranzisaun ne’ebé PODRE “DODOK”, maibé hakarak tranzisaun ne’ebé Saudavel, Seguru, Sustentável no Duradoura.

Jornalista: Xisto Freitas | Editór: Manuel Pinto

Foto: Reprezentante organizasaun rezisténsia hato´o sira nia deklarasaun kona-ba situasaun polítika iha rai laran. Imajen espesiál.