FRETILIN konsidera, opozisaun hakarak hatu’un Governu

Bankada FRETILIN iha Parlamentu Nasionál (PN) kestiona bankada opozisaun CNRT, PLP no KHUNTO ne’eb’e rejeita ona programa VII Governu. Tanba tuir FRETILIN nia haree, fundamentu husi mosaun ne’e, la’os kontra programa Governu, maibé instrumentu polítika ida hodi hatu’un Governu.

Deputada Nurima Alkatiri, husi bankada FRETILIN hateten, bankada opozisaun hatama mosaun rejeisaun hodi rejeita programa VII Governu nian ne’e, hanesan instrumentu polítika ida.

“Ida ne’e grave tanba laiha relasaun ho apresiasaun programa VII Governu nian, no la kompete ba bankada ka Parlamentu Nasional atu kestiona Prezidenti Repúblika nia desizaun. Hahalok sira ne’e hatudu momós katak, fundamentu ba mosaun la’os programa VII Governu nian, maibé bankada opozisaun uza mosaun nu’udar instrumentu polítiku atu hatu’un Governu,” katak Norima Alkatiri iha plenária PN, Kinta (19/10).

Nune’e mós, deputadu David Dias husi bankada FRETILIN hateten,  Governu ne’e minoria, maibé haree tok konstituisaun, maioria ho minoria ne’e oinsa ona.

“Ha’u atu dehan de’it katak, V Governu kaudrus FRETILIN partisipa hanesan individual, tanba laiha dokumentu ida entre FRETILIN ho Governu katak, tenki tama bloku koligasaun,” dehan David Dias.

Nia haktuir, iha tempu ne’eba Kay Rala Xanana Gusmão husik kargu hanesan Primeiru Ministru ho sentidu Estadu katak, nia lakohi Governu ne’e monu, tanba iha momentu ne’eba Ministru barak hetan ona notifikasaun husi Tribunal atu ba tribunal.

“Momentu ne’eba Primeiru Ministru halo duni karta ida mai Parlamentu Nasional atu labele hasai imunidade Ministru sira nian, maibé karta ne’e la divulga iha ne’e, maibé ha’u hatene karta ne’e iha, tanba FRETILIN sei nafatin iha opozisaun sei ko’alia barak, entaun ita labele intende malu,” tenik David Dias.

Nia hatutan, VI Governu ne’e Governu minoria, maibé agora VII Governu ne’e labele minoria fali, tanba saida.

“Momentu ne’eba Prezidenti Repúblika Taur Matan Ruak mak fó pose ba Governu minoria ne’e, maibé FRETILIN la kestiona, tanba FRETILIN kaer metin sentidu Estadu atu lori ba oin. Problema ne’e la’os FRETILIN ninian, no problema la’os ema seluk nian, maibé problema imajen Estadu,” katak David Dias.

Nia esklarese, lider karismátiku Kay Rala Xanana Gusmão hatudu nafatin nia sentidu Estadu, ba rezultadu eleisaun Parlamentar foin lalais ne’e, liu husi konferensia Nasionál CNRT nian, hodi foti desizaun atu ba de’it opozisaun.

Tanba ne’e, David Dias hamosu perguntas ida katak, tuir bankada opozisaun sira nia haree, programa ne’e mak ladiak ka, partidu FRETILIN mak ladiak, ka keta  Primeiru Ministru Mari Alkatiri mak ladiak.

“Karik Mari Alkatiri mak ladiak, ninia ladiak ne’e mak ida ne’ebé? ita ohin loron tu’ur iha ne’e, ita bo’ot sira tenki hatene, saida mak terus. Programa ne’e seidauk mai, ha’u rona tiha ona dehan katak, ami sei lakohi, hahan karik han tiha lai ba, bee karik hemu tiha lai ba mak ladiak ba, saida mak ladiak iha ne’e,”katak David Dias.

Entretantu, deputadu Antoninho Bianco husi bankada FRETILIN mós hateten, primeiravez iha  Estadu Timor Leste, aprezentasaun programa Governu nian, iha mosaun rejeisaun ba programa ne’ebé diak tebes ba povu nia moris.

“Iha tempu ne’ebé lider istóriku sira sei iha, luta na’in sira sei iha, jerasaun foun sira iha, matenek na’in barak iha atu hamutuk, maibé ita lakohi, bainhira mak ita tenki hamutuk, ita hamutuk ba se nia interese, no ita lakohi hamutuk ba se nia interese,” katak Antoninho Bianco.

Tanba ne’e  Antoninho Bianco husu ba matebian sira hotu ne’ebé mate iha funu atu husu deputadu sira iha opozisaun ida-ida kona ba programa VII Governu ne’e, midar ka moruk.

“Programa ne’ebé diak mós, sira dehan ladiak, maibé mundu laiha ida atu perfeitu, kualker grupu ida la perfeitu, tanba ne’e mak ita tenki kompleta malu atu lori nasaun ne’e ba oin. Ohin tentativa dala uluk iha rai ne’e, seiduak halo servisu, ita atu hamonu malu, ida ne’e so akontese iha Timor Leste,” dehan Bianco. cos

GMNTV - Grupo Média Nacional

Foto: Nurima Ribeiro Alkatiri / Facebook ho manipulasaun TA