Violénsia
jéneru nian no grupu arte marsial sira hanesan destake boot hosi konflitu iha
Timor-Leste, nasaun ne'ebé maski joven maibé hanesan pasífiku liu duké
"nasaun sira ho esperiénsia demokrátiku maka'as", haktuir hosi
relatóriu ida.
Relatóriu
"Estadu violénsia nian iha Ázia", hosi Asia Foundation, analiza
tendénsia istóriku sira no atual sira iha nasaun hamutuk 14 iha Ázia, entre
sira maka Timor-Leste, hodi konsidera katak padraun kresimentu ekonómiku no
urbanizasaun bele hamosu aumentu ba konflitu no violénsia iha rejiaun.
"Hanesan
kontráriu, Timor-Leste ho Mongólia hanesan demokrasia rua ne'ebé pasífiku liu
duké nasaun sira ne'ebé iha liu esperiénsia iha governasaun demokrátiku",
hakerek iha artigu ida hosi artigu sira análize estudu nian, ne'ebé asina hosi
akadémiku sira Sana Jaffrey ho Dan Slater.
Relatóriu
refere katak violénsia doméstika ka jéneru nian oho liu feto sira duké konflitu
armadu sira no, tanba ne'e, "tenki iha liu atensaun hosi lejislador sira,
governante sira no hosi komunidade internasional".
Estudu
hatete katak iha Timor-Leste "14% hosi feto sira ne'ebé iha tinan entre 15
no 49 hatete katak hetan ona violasaun" no nasaun iha taxa boot daruak hosi
abuzu infantil iha rejiaun.
Iha
termu jeral, Díli sai nafatin hanesan fatin ne'ebé iha liu rejistu ba insidente
violentu sira, ho estudu haktuir informasaun hosi Belun ne'ebé refere katak
entre tinan 2014 no 2016 rejista insidente violentu hamutuk rihun resin, besik
1/3 hosi total ida ne'ebé akontese ona iha nasaun.
"Fatór
oioin maka halo Díli sai fraku hasoru krimi no hasoru violénsia urbanu, inklui
migrasaun rural ne'ebé lalais ba sidade, dezempregu juvenil, aumentu hosi gang
sira", refere hosi estudu ne'e.
Tuir
estudu, "númeru hosi migrante sira iha Díli aumenta ona hosi 68.887 iha
tinan 2004 ba 94.349 iha tinan 2010" no joven sira barak "maka muda
ba kapital hodi buka hadi'a perspetiva hosi edukasaun no serbisu".
"Ho
maioria populasaun ne'ebé iha tinan ki'ik liu 30, dezempregu juvenil hanesan
problema sériu ida. Resenseamentu tinan 2010 rejista ona taxa dezempregu ida
hosi 40,2% ba joven urbanu sira, iha komparasaun ho 22,8% ba joven rural
sira", hatete hosi estudu.
Estudu
refere katak rai no asesu ba rekursu sira hanesan "fatór prinsipal hosi
konflitu komunal" ho konfitu sira hamosu friksaun no violénsia iha
Timor-Leste.
Iha
Timor-Leste iha mós violénsia entre grupu arte marsial sira (GAM), problema
ne'ebé Estadu timoroan kombate nafatin iha tinan hirak ikus ne'e no afeta zona
oioin hosi kapital, Díli, no mós iha sidade sira seluk.
Iha
kazu balun, prezensa maka'as hosi joven sira ne'ebé iha ligasaun ba GAM ida iha
aldeia balun iha Díli, hanesan ezemplu, ikusmai uza hanesan "arma"
iha konflitu sira ho aldeia viziñu sira.
"Buat
ne'ebé maka dalabarak hanesan xoke ida hosi gang sira ka GAM dalabarak hanesan
disputa komunitáriu entre aldeia sira, tanba komunidade ida-idak mobiliza sira
nia joven hodi defende nia teritóriu. Ne'e hanesan padraun hosi insidente
violentu sira iha Díli", refere hosi estudu.
Iha
kazu balun "konflitu sira entre família sira iha distritu rural sira bele
to'o iha Díli" ne'ebé rezidi família sira ka viziñu sira hosi zona
hanesan, halo mosu dalabarak aumentu ba "violénsia vingansa nian".
Autoridade
timoroan sira identifika ona grupu lima hosi arte marsial ativu sira - PSHT,
Kera Sakti, Korka, Kolimau ho 77 - hanesan sira ne'ebé maka envolve iha númeru
barak hosi insidente sira iha kapital timoroan nian.
Análize
sira hosi Asia Foundation rasik, hosi 2015, aponta ona ba konflitu rai sira
nian hanesan ameasa prinsipal ba seguransa hosi komundade lokal sira, ho
organizasaun Belun rejista kazu insidente hamutuk 130 ne'ebé maka envolve rai
iha pasadu.
SAPO
TL ho Lusa
Sem comentários:
Enviar um comentário