sexta-feira, 13 de outubro de 2017

Alkatiri: Eventual Governu jestaun timoroan nian labele asina tratadu fronteira nian ho Austrália

Iha loron-kinta ne'e primeiru-ministru timoroan hatete ona katak bainhira Governu tuun, tanba karik reprovasaun iha semana oinmai ba programa, Ezekutivu sei hela iha jestaun no laiha kondisaun sira hodi asina tratadu ida fronteira sira ho Austrália.

"Laiha kondisaun. Laiha Governu ida jestaun nian maka asina tratadu sira. Ema hotu tenki hanoin iha asuntu ne'e", Mari Alkatiri hatete bainhira hatán ba Lusa kona-ba impaktu ne'ebé maka negosisasaun sira entre Díli ho Canberra bele hetan bainhira la aprova Programa Governu nian.

Delegasaun sira Timor-Leste ho Austrália iha semana ne'e hasoru malu iha Haia, ho patrosíniu hosi komisaun ida konsiliasaun ONU nian hodi tenta taka akordu ida kona-ba fronteira tasi nian entre nasaun rua.

Xanana Gusmão, ne'ebé lidera delegasaun timoroan, maka hanesan prezidente hosi Congresso Nacional da Reconstrução Timorense (CNRT), partidu daruak ne'ebé hetan liu votu hafoin Frente Revolucionária do Timor-Leste Independente (Fretilin) hosi Alkatiri, ne'ebé halo parte iha bloku ida hosi opozisaun maioritáriu ho Partidu Libertasaun Popular (PLP) hamutuk ho Kmanek Haburas Unidade Nacional Timor Oan (KHUNTO).


Alkatiri esplika katak Xanana Gusmão aseita ona hodi okupa kargu nu'udar responsável ba Autoridade Importante foun ida ne'ebé sei kaer projetu importante Tasi Mane, iha kosta-súk nasaun nian, ne'ebé kalkula ho folin dolar millaun resin.

"Hatán pozitivu tebes. Hafoin programa Governu hetan aprovasaun, Governu sei aprova dekretu-lei ida hosi regulasaun autoridade nian, ne'ebé sei iha autonomia finanseiru ho patrimonial. No hafoin ne'e primeiru-ministru sei aprezenta no Prezidente sei nomeia no sei fó pose ba Xanana Gusmão hodi lidera estrutura ne'e", Alkatiri esplika.

Nia esplika katak kargu ne'e sei permiti lidera prosesu relasionadu ho fronteira sira no mós projetu investimentu nian ne'ebé boot tebes ba zona súl, ne'ebé iha relasaun direta ho área petrolíferu.

Mari Alkatiri ko'alia ba jornalista sira hafoin reuniaun semanal, durante oras ida resin, ne'ebé nia halo ho xefe Estadu, Francisco Guterres Lu-Olo, ne'ebé maka nia aprezenta mós kópia ida hosi programa Governu nian no ne'ebé nia analiza hamutuk "situasaun polítika, sosial ho ekonómiku".

"Ha'u aprezenta mós lista ikus hosi membru sira Governu nian. Hamutuk elementu na'in haat, feto na'in rua no mane na'in rua", nia esplika.

Entre kargu sira ne'ebé seidauk prenxe iha kargu sira ministru Justisa no Turizmu nian.

Bainhira Lusa husu kona-ba asinatura hosi plataforma ida akordu nian entre forsa sira opozisaun nian, CNRT, PLP ho KHUNTO, Alkatiri hatete katak hanesan hatudu "inkonsisténsia no laiha ligasaun".

"Iha Timor-Leste laiha buat ida maka la halo ha'u hakfodak. Laiha firmeza no laiha koerénsia. Ha'u la toman serbisu ho inkonsisténsia no inkoerénsia. Ha'u sei nafatin hanesan ne'e, sei halo nafatin buat ne'ebé maka ha'u promete, no la'ós la'o ba mai", Alkatiri hatete.

Primeiru-ministru reaje mós ba komentáriu sira ne'ebé líder hosi bankada Partidu Libertasaun Popular (PLP), Fidelis Magalhães, hato'o ba jornalista sira, ne'ebé hatete katak programa Governu nian "kuaze hanesan" ho programa hosi nia partidu.

"Entaun bainhira PLP vota konkorda, sei la vota kontra", nia hatete.

Bainhira hatán karik hein atu programa Governu nian aprova iha Parlamentu Nasional - reprovasaun ida no karik Governu sei monu presiza aprovasaun hosi proposta rejeisaun rua - Alkatiri lamenta ona kona-ba krítika sira hasoru dokumentu.

"Hanesan triste tebes tanba ema sira hakarak halo kontra ba buat ne'ebé maka hanesan ita hotu nian. Ne'e hanesan programa ida hodi serbi povu, la'ós atu serbi maioria ka minoria. Hanesan programa ida ne'ebé nasaun presiza", nia hatete.

"Ha'u la'ós iha ne'e hodi konvense partidu sira. Ha'u kumpri obrigasaun no direitu hosi Governu hodi aprezenta nia programa. Bainhira hetan aprovasaun, bainhira la hetan entaun ita ba eleisaun antesipadu", nia hatutan.

SAPO TL ho Lusa

2 comentários:

DIREITU ADMINISTRATIVU KONSTITUSIONAL TIMOR-LESTE disse...

Hau hare, Sr.PM.Mari ALKATIRI, lakon ona nia intelegensia.iha prosesu formasaun Governo 7 Konstitusional ida nee tamba nia (Mari Alkatiri) komesa argumenta ho razaun oin-oin hodi grantia Nia Governasaun, maibe, ita hare Sr. PM Mari Alkatiri nia argumentus sira nee hatudu momos ba publiku KATAK,fo Projetu ba Maun Xanana,hodi apoiu nia programa,hanoin karik maun Xanana iha ambisaun atu hadau malu projetu ka fo projetu Tasi mane hodi sosa maun Xanana? perguntas mak.nre, Nasaun ida nee se los nia? Maun Mari Alkatiri nian?'ka Maun Maun Xanana nian? ka Maun Lu Olo nian? ka maun Ramos nian.?
perguntas nee mosu tamba mosu duvidas iha publiku konaba struktura formasaun governasaun VII konstitusional.Uluk Maun Xanana lidera Governo Bloku iha governasaun V konstitusional, Maun Mari Alkatiri. sempre kritika makas iha media, katak Governasaun nebe lidera husi Maun Xanana inkapacidade, inkonstitusional no seluk-seluk tan. maibe maun Xanana fo projetu Oecuse ba Mari Alkatiri kaer, nia lian lakon tiha kedas. agora situasaun refere Maun MARI Alkatiri, atu selu fali tusan nebe maun Xanana halo ba maun Mari Alkatiri. ida nee maka maun Xanana simu projetu nee, no oposisaun Bloku maioria parlemener la bele konsistente ba posisaun politika, hodi forma plataforma AMP, maka ita bele foti konklusaun katak NASAUN TIMOR LESTE sai hanesan Nasaun de Projetu ba Groupo minoria nian. ita espera buat sira nee sei la akontese, tamba nasaun ida nee, forma ho ruin, ran no mata wen povu maubere NIAN. laos Groupo minoria nian projetu.

Unknown disse...

Irmão ENCO UNPAZ,ita bót presija atu akompanha no studa halo didiak liu tan konaba politika nivel alto sira nian.

Sr. ENCO UNPAZ halo analiza la kritiku liu tuir kriteria hanesan ema nebe analizitiku.

Klaru que politika nia lala'ok mak sai realidade ba povu tomak hare, akompanha no hatene muinto bem...tematika iha leten la fo benefisiu diak ba povu tamba membros do partido opozisaun balun hanosu arogansia e tauk sekarik Fretilin mak kaer ukun iha tinan 5 nia laran balun sei sai frustado. Tamba-sa?, tamba atu hakribi no tau mata dalan do governo no estado ida diak so fretilin maka iha korenti ida forte, iha spesifiko desijaun balun hodi hatur presperiedade do povu no nasaun.