sexta-feira, 22 de setembro de 2017

Primeiru-Ministru: Sei hatene membru sira seluk hosi Governu timoroan iha loron-sesta

PARTILHAR

Iha loron-kinta ne'e, primeiru-ministru timoroan afirma ona katak hein atu aprezenta, to'o loron-sesta loraik, ba xefe Estadu lista hosi membru sira seluk Governu nian no ne'ebé sei simu pose iha semana oinmai.

"Ha'u sei halo posibilidade tomak ba aban loraik [loron-sesta] hodi iha lista ba Prezidente hodi nune'e bele simu pose iha semana oinmai", Mari Alkatiri hatete ba jornalista sira.

"Sei hanesan Governu inkluzivu ida", nia hatete maibé lakohi hato'o tan komentáriu sira kona-ba elementu sira ne'ebé sei hamutuk ho membru na'in 12 hosi ezekutivu ne'ebé maka simu ona pose iha loron-sesta liubá.

Alkatiri ko'alia bainhira hakotu enkontru semana regular dahuluk entre xefe Governu no Prezidente timoroan, ne'ebé hala'o iha Palásiu Prezidensial, iha Díli.


Enkontru ne'e akontese liutiha loron rua hafoin reuniaun dahuluk hosi Konsellu Ministru sira nian no liutiha semana ida de'it hafoin membru na'in 12 hosi Governu konstitusional dahitu simu pose, antesipa katak ezekutivu ne'e sei iha total hamutuk elementu na'in 30.

"Hanesan ami nia enkontru dahuluk iha ámbitu hosi enkontru semanal baibain entre primeiru-ministru ho Prezidente. Ha'u fó ona informasaun kona-ba situasaun no ha'u buka rona disponibilidade hosi Prezidente hodi bele fó pose iha semana oinmai ba membru sira seluk Governu nian. Prezidente konfirma ona disponibilidade ne'e", nia hatete.

Alkatiri esplika ona katak objetivu maka aprezenta Programa Governu nian iha Parlamentu Nasional to'o loron 15 no "hafoin ne'e" Orsamentu Retifikativu ba tinan 2017, importante tanba alterasaun iha estrutura Governu nian.

Hafoin ne'e hahú kedas prosesu preparasaun hosi konta públiku sira ba tinan 2018.

Iha ámbitu seluk, xefe Governu lakohi konsidera hanesan lakon ida ba Frente Revolucionária do Timor-Leste Independente (Fretilin) tanba ladún iha reprezentasaun iha lideransa hosi komisaun espesializadu sira hosi Parlamentu Nasional nian.

"Ha'u la asumi ne'e hanesan lakon ida maibé hanesan tentativa ida hodi fahe poder entre opozisaun ho Fretilin. Ne'e hanesan mós dalan inkluzaun ida", nia hatete.

Bainhira hatán kona-ba notísia sira ka komentáriu sira ne'ebé ko'alia kona-ba Governu nia fraku, minoritáriu no apoia de'it hosi deputadu na'in 23 hosi Fretilin no na'in hitu hosi Partidu Demokrátiku (PD), iha parlamentu ho fatin 65, Alkatiri hatete katak nia respeita análize sira.

"Ema sira la akompaña prosesu ho di'ak. Sira senti preokupadu oituan no haree ho análize sira ne'ebé dalaruma ladún iha ligasaun ho kontestu", nia hatete.

Alkatiri hatete katak Governu foun serbisu hamutuk hela ho membru sira hosi ezekutivu anterior no ho funsionáriu importante sira hosi gabinete sira hodi hametin tranzisaun.

"Liutiha tinan 10 governasaun nian iha memória ida ne'ebé labele haluha no sei iha konsiderasaun ba memória ne'e. Tanba ne'e ha'u husu ona ba membru sira hosi Governu anterior no funsionáriu superior sira seluk hodi serbisu nafatin ho Governu foun hodi nune'e labele lakon memória ne'e", nia hatete.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: