sexta-feira, 22 de setembro de 2017

Partidu Oposizaun Balun Involve iha Governu

DILI, (TATOLI) – Adjuntu Sekretáriu Jerál partidu Frente Revolusionariu Timor-Leste Indepéndente (FRETILIN), José Reis hatete, posibilidade boot governu ne’e sei involve partidu opozisaun iha governasaun.

Relasiona ho deklarasaun lider partidu opozisaun ne’ebé deklara sei la-involve iha governu, José Reis hateten: “Sé mak dehan (lakohi) semana oin mak imi hareeʺ, hatan ba jornalista sira hafoin hasoru malu ho Primeiru Ministru, Marí Alkatiri iha Palásiu Nobre Lahane, ohin.

Tuir planu Prezidente Repúblika, Francisco Guterres Lú Olo sei fo tan pose ba membru governu nain 18 hodi kompleta estrutura governu da-hituk hamutuk ema 30.
Alende ne’e, lider Partidu Demokráriku (PD), Mariano Asanami Sabino no António da Conceição mós halo enkontru ho xefe governu hodi diskute kona-ba funsionamentu no komunikasaun koligasaun ba futuru.

“Ami haree liu ba koligasaun oinsá atu halo komunikasaun ne’ebé di’akʺ, haktuir Asanami ba jornalista sira.

Asanami afirma, ukun ne’e povu nian, hamutuk ita bele, ne’ebé ita nakloke no bolu malu para la’o hamutuk ba oin atu dezenvolve Timor-Leste.

Ba interese nasionál liliu ba dezenvolvimentu, Asanami garante deputadu parlamentu sei apoiu programa governu da-hituk.

Jornalista: Agapito dos Santos | Editora: Rita Almeida

Foto: José Reis. Foto espesiál

Sem comentários: