quinta-feira, 21 de setembro de 2017

Panglima TNI Vizita Dili-Baucau

PARTILHAR
DILI - Ulun boot Militar Indonesia ka Panglima TNI Jeneral Gatot Nurmantyo, ohin Kuarta (20/9/2017) vizita iha Timor Leste (TL). Vizita loron ida Panglima TNI Jeneral Gatot Nurmantyo nian nee, atu hare ho matan Simiteriu Heroi (Taman Makam Pahlawan) iha Dili no Baucau.

Embaixador RI ba Timor Leste, Sahat Sitorus  informa ba jornalista sira kona ba vizita Panglima TNI Jeneral Gatot Nurmantyo nian liu husi konferensia imprensa iha Hotel Timor, Dili, Sabadu (16/9/2017).

Embaixador Sahat Sitorus esplika liutan katak Governu Indonesia no TL iha ona akordu katak simiteriu heroi Indonesia nian nafatin iha TL, maibe iha fatin rua deit hanesan Taman Makam Pahlawan Seroja Dili no Taman Makam Pahlawan Baucau. Simiteriu Heroi sira nian iha Munisipiu seluk muda hotu ba Dili no Baucau. Husi  Munisipiu Kovalima no Bobonaro muda ba Atambua.

Tuir Embaixador Sahat Sitorus, simiteriu heroi sira nian iha TL konsentra deit iha fatin rua (Baucau no Dili), atu nunee familia husi herois sira neebe hakarak mai TL atu sunu lilin iha heroi sira nia rate ba deit fatin rua nee.


Antes Panglima TNI Jeneral Gatot Nurmantyo vizita TL, KBRI Dili servisu hamutuk ho ekipa husi ministeriu defesa Indonesia nian halo preparasaun hanesan renovasaun simiteriu iha Dili no Baucau.


Embaixador Sahat Sitorus mos informa katak relasiona ho vizitasaun Panglima TNI Jeneral Gatot Nurmantyo iha TL, iha Tersa (12/9/2017), Panglima Militar IX/Udayana, Mayjen TNI Komaruddin Simanjuntak vizita TL hodi halo preparasaun ba vizitasaun Panglima TNI Jeneral Gatot Nurmantyo.

Kona ba vizitasaun Panglima TNI Jeneral Gatot Nurmantyo nian nee, Terseiru Sekretaria Funsaun Komunikasaun Sosial no Kultura KBRI Dili, Marina Meinaris Wari ba STL hatete, Panglima Jeneral Gatot Nurmantyo to’o iha Dili tuku 09.30, ho avian Hercules TNI nian.

Tuir Marina, bainhira to’o iha Aeroportu Internasional Prezidente Nicolao Lobato, Komoro, Dili, ulun boot militar Indonesia nian nee, diretamente simu husi Embaixador RI ba TL, Sahat Sitorus akompania husi Atase Defesa Militar iha KBRI Dili, Kolonel Hari Santoso nomos diplomata sira seluk husi KBRI Dili.

Alein de nee, katak Marina, Panglima TNI Jeneral Gatot Nurmantyo sei hasoru malu ho Vise Xefe Estado Maior Major Jeneral F-FDTL, Brigadeiru Jeneral Filomeno Paixao de Jesus iha Aeroportu Internasional Prezidente Nicolao Lobato, Komoro, Dili. Tuir Marina, iha planu Panglima TNI Jeneral Gatot Nurmantyo atu hasoru malu ho Xefe Estado Maior Major Jeneral F-FDTL, Lere Anan Timor, maibe tanba Major Jeneral Lere Anan Timor laiha iha fatin, maka Panglima TNI Jeneral Gatot Nurmantyo hasoru deit ninia vise.

Husi Aeroportu Internasional Prezidente Nicolao Lobato, Panglima TNI Jeneral Gatot Nurmantyo ho ninia komitiva vizita Taman Makam Pahlawan Seroja Dili. Depois Panglima TNI ho ninia komitiva akompania husi Embaixador Sahat Sitorus vizita Taman Makam Pahlawan iha Baucau. Fila husi Baucau, Panglima TNI Jeneral Gatot Nurmantyo fila hikas ba Indonesia.

Tuir observasaun STL iha terenu hatudu katak antes vizita Panglima TNI Jeneral Gatot Nurmantyo iha Dili no Baucau, populasaun hakfodak ho prezensa militar Indonesia nian iha Baucau. Prezensa militar Indonesia nian nee halo preparasaun ba vizitasaun Panglima TNI Jeneral Gatot Nurmantyo nomos sira halo renovasaun Taman Makam Pahlawan Baucau. 

Mikael M. Mau/Yoseph Koa | Suara Timor Lorosae
PARTILHAR

Author: verified_user

Publicação luso-timorense sem fins lucrativos

0 comentários: