quinta-feira, 21 de setembro de 2017

Hotel iha Díli simu treinu antiterorista iha final hosi kursu ne'ebé fó hosi GNR

PARTILHAR

Loraik hakmatek iha Hotel Timor, iha sentru Díli nian, iha loron-kuarta ne'e marka hosi ezersísiu ida ne'ebé envolve grupu ida efetivu sira hosi unidade foun liu hosi polísia timoroan nian, sesaun antiterorista nian, ne'ebé harii ho apoiu hosi GNR.

Ho hatais metan, ekipadu no armadu, formandu besik na'in sanulu resin hakotu ona iha loron-kuarta ne'e, ho simulasaun hosi operasaun ida buka no hasai arma ba ema armadu ida, kursu ne'ebé maka halo hosi instrutor portugés na'in lima iha semana 14 nia laran.

Diogo Chiote, tenente destakadu iha Grupu Intervensaun no Operasaun Espesial sira (GIOE) hosi Unidade Intervensaun GNR nian, esplika ona ba Lusa katak kursu ne'e halo parte iha programa ida boot hosi koperasaun entre rejimentu portugés ho Polísia Nasional Timor-Leste (PNTL).


"Iha nesesidade hodi fó formasaun hodi harii seksaun antiterorista ne'ebé hanesan validade ida ne'ebé falta iha nasaun ne'e. Tanba GNR, liuhosi GIOE, iha kapasidade no esperiénsia nesesáriu no instrutor adekuadu sira nune'e maka desidi ona hodi avansa ho kursu iha Timor", nia esplika.

"Tanba Timor konsidera hanesan nasaun ida ne'ebé posibilidade atu akontese insidente terorista hanesan ki'ik ne'e la signifika katak lalika iha protesaun ne'e. Nune'e maka desidi harii forsa ida ne'ebé maka preparadu hodi halo intervensaun no iha asaun", nia subliña.

Ho ema na'in 17 maka simu formasaun, kursu ne'e destina ba elementu sira hosi Kompañia Operasaun Espesial sira hosi Unidade Espesial Polísia nian, ne'ebé agora konstitui iha Seksaun Antiterorista dahuluk hosi PNTL.

Kursu fahe iha parte rua, ida ho semana ualu no hala'o iha Portugal, ne'ebé ema timoroan sira aprende "tátika ho tékniku baze hosi intervensaun tátiku-polisial iha situasaun sira hosi kontraterorizmu nian ka insidente todan sira seluk ne'ebé komplikadu ka iha risku espesial", haktuir hosi nota ida ne'ebé haruka ba Lusa.

Parte daruak, semana neen iha Díli, hakarak adapta téknika sira no tátika sira ne'ebé sira hetan ba realidade iha rai laran, hosi ameasa no senáriu sira Timor-Leste nian.

Chiote esplika katak nia objetivu maka estuda oinsá aplika iha Timor-Leste téknika sira ne'ebé aprende iha Portugal, hanesan ezemplu asaun ida hodi trava terorista ka ema violentu ida iha autokarru laran.

"Iha ne'e autokarru sira hanesan oinseluk tebes, iha mikrolet sira, fatin la hanesan no serbisu ne'ebé tenki hala'o mós la hanesan", nia hatete.

"Hanesan di'ak tebes kontinua ho kursu tanba kursu ne'e forma de'it elementu sira. Tenki kontinua nia preparasaun, aumenta treinu, kontinua nafatin programa rigorozu ida treinu nian, estudu no planeamentu ne'ebé iha Timor-Leste seidauk hala'o", nia hatutan.

Serimónia entrega diploma sira ne'ebé sei marka final hosi kursu sei halo iha loron-kinta iha Unidade Espesial Polísia (UEP) nian iha Díli.

SAPO TL ho Lusa | Foto Hotel Timor / Booking.com
PARTILHAR

Author: verified_user

Publicação luso-timorense sem fins lucrativos

0 comentários: