sexta-feira, 15 de setembro de 2017

Governu Tenke Taka Atividade Hong Long

DILI - Governu Timor Leste tenke taka atividade Investementu Ikan neebe mak kaer husi kompania Hong Long tanba, kompania la kunpri Lei ho orden hodi kaer ikan protezidu iha Tasi Timor liu liu iha area Kosta Sul nian.

Preokupasaun nee fo sai husi, Eis Prezidente da Republika, Jose Ramos Horta ba Jornalista Kuarta (13/09 2017) iha BCTL Akait Dili, hafoin Partisipa lansamentu Moeda TL nian.

“Hau hanoin ita tenke kontrola kompania sira neebe maka governu fo fiar hodi kaer iha rai laran, karik kompania nee la kumpri lei ho orden maka governu tenke hola medidas hodi taka, tanba kompania Cina nee la halo tuir lei ho orden, sira kontinua kaer ikan protezidu tan nee governu tenke foti medidas ba kompania Hong Long,” dehan Ramus Horta.

Nia mos informa tan katak, Investementu ekonomia Timor Leste atu lao diak maka, Presiza diversivika laos, kompania sira mai atu estraga ambiente Timor nian. Tanba nee husu ba governu liu-liu Ministéiru Agrikultura, atu fo sasansaun ida neebe todan ba kompania neebe kaer ikan tubaraun no hapara dereita sira nia atividade.


Hatan ba Preokupasaun nee, Ministru Agrikultur hateten nia rasik simu ona informasaun konaba Kompania Hong Long Kaer Ikan Tubaraun, ida nee presija hare no halo investigasaun klean hodi hare ikan tubaraun protezidu ka laos.

“Hau simu ona Informasaun konaba atividade nee, no teknika sira tun ona ba baze hodi haree didiak, kompania nee kaer duni ikan Tubaraun ka ou sira kaer ikan protezidu, no atu fo sansaun maka ita tenke investiga didiak iha baze tebes duni ka lae,” informa Ministru MAP Estanislau da Silva.

Nia mos informa liu tan katak, bain hira halo investigasaun ba kompania nee, langar duni lei ho orden maka kompetensia governu nian atu fo sansaun, maibe laos tuberaun protezidu maka nee sei la sai problema.

Tuir Ministru nee katak, antes nee governu foti ona desijaun multa ba kompania tanba, kaer ikan tubaraun ho rajaun ikan tama sala redi mak mate, maibe agora iha provas investigasaun hare kompania kaer ikan tubaraun, Governu sei fo sansaun ida todan.

“Hau labele kolia katak ita hapara direita maibe, presija hare iha provas investigasaun, klaru karik provas los hau rasik sei fo sasansaun ba kompania nee, tanba sira labele viola ita nia lei,” dehan nia.

Tuir akordu neebe mak iha kompania neebe naran Hong Log  husi Nasaun Cina no mai halo investementu ikan iha TL, kompania nee mai  ho Ro 15 neebe lansa iha loron Sabadu 19-fulan Novembru 2016 tinan kotuk liu ba.

Too notisia nee hatun STL seidauk hetan konfirmasaun husi parte Kompania Hong Long neebe, governu TL tau fiar hodi halo investimentu Ikan iha TL, no seidauk hetan resposta husi kompania Hong Long tanba agora dadauk sira halo hela atividade iha Kosta Sul. 

Madalena Horta | Suara Timor Lorosae

Sem comentários: