Espesialista sira hakarak lori telemedisina ba nasaun tomak CPLP nian

Espesialista sira saúde nian hakarak aproveita esperiénsia hosi Brazil, Cabo Verde ho Portugal hodi lori telemedisina ba Komunidade hosi Nasaun sira Lian Portugeza (CPLP) tomak, hodi halibur prosesu sira, hadi'a utilizasaun ba rekursu sira no koperasaun.

Intensaun ne'e avansa iha loron-kuarta ne'e ba imprensa hosi responsável ba serbisu telemedisina Cabo Verde nian, Vanda Azevedo, no hosi kordenador Rede Universitáriu hosi Telemedisina nian, Luiz Ary Messina, durante abertura hosi reuniaun dahuluk hosi área nian ne'ebé akontese iha sidade Praia.

"Ami hein reuniaun ne'e ho ansiedade, tanba bainhira Cabo Verde, Brazil ho Portugal iha ona programa estruturadu ida hosi telemedisina nian, nasaun sira seluk (hosi CPLP) laiha. Nune'e ami hakarak atu bele halibur prosesu sira", hatete hosi Vanda Azevedo.

Responsável médika afirma ona katak Cabo Verde, Brazil ho Portugal fahe ona esperiénsia sira no hakarak atu koñesimentu sira ne'e bele fahe mós ho Angola, Guiné-Bissau, São Tomé & Prínsipe no nasaun sira seluk ne'ebé ko'alia lian portugés.

"Esperiénsia iha Portugal, Brazil ho Cabo Verde - no nune'e realizasaun hosi reuniaun iha Cabo Verde, liuhosi esperiénsia ho illa sia ne'ebé iha populasaun - sei hanesan importante ba nasaun sira seluk ne'ebé seidauk iha", hatutan hosi Luíz Ary Messina.

Kordenador hosi Rede Universitáriu Telemedisina nian (RUTE) hosi Brazil, organizador ida reuniaun nian, haree ona katak ministériu Saúde tomak CPLP nian hanoin ona kona-ba prátika saúde dijital nian maibé nia refere ona katak presiza rekursu sira hodi bele avansa lalais.

"Karik, importante liu maka tanba ita iha ona nasau balun ho esperiénsia no iha jeral sei hetan partisipasaun hosi reprezentante sira hosi Ministériu sira Saúde CPLP nian (iha reuniaun)", nia hatutan.

Guiné-Ekuatorial ho Timor-Leste de'it maka laiha reprezentante ruma iha reuniaun, ne'ebé iha durasaun loron tolu no ne'ebé sei ko'alia tema oioin kona-ba saúde dijital iha lian portugeza.

Luíz Ary Messina hatete katak iha fulan-Marsu tinan liubá elabora no aprova ona roteiru estratéjiku ida hosi telemedisina ba CPLP no hatete katak reuniaun ne'e sei serve hodi elabora planu serbisu ida kona-ba asaun sira no sei presiza hodi aplika.

Kordenador RUTE nian destaka ona importánsia hosi planu serbisu nian ne'ebé sei hetan iha reuniaun, konsidera katak sei serve ba nasaun sira hodi buka hamutuk rekursu sira no integra nasaun tomak no ema ida-idak iha área.

"Neineik, ministériu sira Saúde nian sei hatene importánsia hosi saúde dijital. Ha'u nia espetativu no esperansa maka ne'e sei hahú serve no sei komprende hanesan vasina ida ba prosesu tomak iha área saúde nian", Luiz Messina hatete.

Kordenador subliña ona importánsia hosi partisipasaun área privadu nian, konsidera katak sei mosu produtu sira ne'ebé halo hosi empreza sira ne'ebé sei serve hanesan avansu boot ida iha medisina dijital iha nível hosi komunidade lian portugeza nian.

SAPO TL ho Lusa