quarta-feira, 20 de setembro de 2017

Di’ak Liu Apoiu Governu Duke Hanoin Eleisaun Antisipada

PARTILHAR
DILI, (TATOLI) - Vigáriu Jerál Dioseze Dili, Pe. Jovito do Rego hateten nia la konkorda bainhira halo eleisaun antisipada tanba gasta osan barak no povu ida ne´e kolen tiha ona atu halo eleisaun antisipada, tan ne´e lalika tan provoka situasaun.

“Tanbasá la apoiu de´it governu ida ne´e la´o ba oin, maibé tenki halo eleisaun antisipada? Ha´u hanoin la presiza halo eleisaun antisipada. La´ós tempu ona atu kondena malu beibeik maibé tempu ona atu fó liman ba malu no tulun malu atu hadi´a buat ne´ebé ladi´ak,” Amu Jovito hato´o kestaun ne´e ba jornalista sira iha Palásiu Prezidente Nicolau Lobato, Bairru-Pité, Dili, tersa ne´e, bainhira husu ninia komentáriu kona-ba polémika eleisaun antisipada.

Tuir nia katak tinan sanulu resin lima ukun rasik an, povu no lider nasaun iha ona maturidade ne´ebé ás no maturidade ida ne´e tenke manifesta iha asaun polítika ka hahalok polítika ninian.

“Partidu ida ne´ebé maka manán eleisaun, ne´e hotu-hotu nia partidu maka ida ne´e, maski ita la hili nia. Nia sa´e ba ukun, ukun povu. Tanba ne´e, ha´u hakru’uk,” Vigáriu Jerál Dioseze Dili haklaken.


Pe. Jovito informa katak objetivu polítika maka atu serbí povu, asegura povu nia estabilidade no povu nia moris di´ak. Maibé, lider Igreja Katólika ne´e sente triste bainhira haree timoroan sira laiha boa vontade polítika.

“Hanesan ema ne´ebé boot iha funu laran no hakarak rai ida ne´e nia di´ak, ha´u triste kuandu haree maluk timoroan sira laiha boa vontade polítika. Hakarak apelu ba nai ulun sira, partidu polítiku sira katak  sira ne´e rikusoin (asset) nasaun ida ne´e ninian. Asset ida ne´e tenki hatudu ninia osan mean, la´ós hatudu fali besi-ten,” nia esklarese.

“Ita presiza nai ulun sira ne´ebé fuan osan mean atu hakuak situasaun polítika ne´ebé dehan iha krize atu lalika aumenta krize. Ita bele hamate krize ne´e no lalika ba komplika tan situasaun ida ne´ebé komplikada tiha ona. Sé hadomi Timor no hadomi povu, pás no estabilidade, hadomi dezenvolvimentu, ita presiza husik eransa ne´ebé di´ak ba rai ida ne´e. Tempu to´o ona, la´ós ita tuku malu beibeik ho politikise (polítika ulun tún ain sa´e),” Amu Jovito fó hanoin.

Jornalista: Xisto Freitas | Editór: Manuel Pinto

Foto: Vigáriu Jerál Dioseze Dili, Pe. Juvito do Rego, dadalia ho jornalista sira iha Palásiu Prezidente Nicolau Lobato, ohin.
PARTILHAR

Author: verified_user

Publicação luso-timorense sem fins lucrativos

1 comentários:

Dudu disse...

Ba fiar fali amo juvito no amo sira naok ten ne timor ne konaba saida nian...amo juvito lano ho osan subidiu nebe governo fo ba igreza no agora amo no madere sira iha timor han toba tiha deit no la presisa halo servico ida. Sira haluha tiha saida mak uluk saida mak sira halo lori igreza nia naran iha 2006 hasoru governo iha palacio governo oin........uluk tanba saida mak igreza catolico mobiliza povo sira husi distrito 12 mai consentra iha Dili? Amo naokten sira ne halo saida ba sarani catolico iha Timor? susu sarani nia osan lori fo ba nia familia hodi hariko an....amo juvito no amo sira seluk iha timor ne presisa lori ba tribunal ba abuso sexual nebe sira halo ba ema nia oan sira timor