quinta-feira, 17 de agosto de 2017

Posse IV Lejizlatura Anunsia mós VII Governu Koligasaun

DILI, (TATOLI) - Partidu tolu hanesan FRETILIN, Partidu Libertasaun Populár (PLP) no KHUNTO sei anunsia Governu Koligasaun ne’ebé sira forma ona iha serimónia tomada pose Kuarta Lejizlatura iha Parlamentu Nasionál, Segunda (21/8).

Lia ne’e hato’o hosi lider partidu FRETILIN, Dr. Mari Alkatiri no Konselleiru Partidu KHUNTO, José dos Santos Naimori Bucar ba jornalista sira iha Hotel Novo Turizmo, Lesidere, Dili, kinta dadeer ohin, hafoin ramata diskute asuntu formasaun governu.

Mari hateten partidu tolu sei finaliza diskusaun plataforma governasaun iha domingu (20/8), nune’e iha segunda bele aprezenta ba públiku.

Tuir Mari katak Governu foun ne’e sei la’o ho estrutura ki’ik tanba estrutura ki’ik bele book lais liu duké estrutura boot ne’ebé book an todan no hatodan despeza Estadu.


Nia hatuan Governu foun nakloke ba ema hotu (ema independente no ema fora hosi partidu tolu ne’ebé halo koligasaun), dezde ema ne’e hatene halo serbisu no apoiu programa Governu Koligasaun.

Iha fatin hanesan, Konselleiru Superiór Partidu Kmanek Haburas  Unidade Timoroan (KHUNTO), José dos Santos Naimori Bucar hateten sira simu koligasaun ho fuan tanba ho Governu Koligasaun bele responde promesa sira ne’ebé maka sira hato’o ba povu iha kampaña eleisaun parlamentár foin lalais.

Entretantu aban dadeer, FRETILIN sei halo diálogu daruak ho estrutura Partidu Demokrátiku (PD) iha Hotel Novo Turizmu. Iha diálogu ida ne’e la’ós atu diskute koligasaun maibé atu rona PD nia hanoin kona-ba oinsá sira nia kontribuisaun iha Parlamentu Nasionál hodi haburas demokrasia no garante estabilidade no pás.

“Hanesan ha’u hateten fila-fila ona katak FRETILIN nia odamatan no janela nakloke luan ba ema hotu atu mai tuur hamutuk ho FRETILIN hodi diskute kona-ba dezenvolvimentu ida buras liu ba Timor no estabilidade nasionál,” Sekretáriu Jerál FRETILIN, Mari Alkatiri haklaken.

Jornalista: Xisto Freitas | Editór: Manuel Pinto

Foto: Estrutura partidu FRETILIN ne'ebé lidera hosi Dr. Mari Alkatiri no KHUNTO lidera hosi Konselleiru Superiór, José dos Santos Naimori Bucar, ko'alia ba jornalista sira kona-ba sira nia konsisténsia atu harii Governu Koligasaun kompostu hosi partidu tolu hanesan FRETILIN, PLP no KHUNTO.

Sem comentários: