Obra Sira Ne’ebé Asina Ona Sei Kontinua

DILI, (TATOLI) - Primeiru Ministru, Dr. Rui Maria de Araújo hateten maski VI Governu Konstitusionál nia mandatu besik atu ramata maibé obra sira ne’ebé asina ona kontratu kontinua implementa ba oin.

“Programa sira ne’ebé tama ona iha planu hala’o nafatin liu-liu obra sira ne’ebé asina ona kontratu namoos kontratu sira halo ona konkursu besik atu hotu kontinua hala’o ba oin,” Rui hato’o kestaun ne’e ba jornalista sira iha Palásiu Prezidente Nicolau Lobato, Bairu-Pité, Dili, kinta ne’e, hafoin sorumutu ho Xefe Estadu Dr. Francisco Guterres Lú Olo.

Nia informa Governu nia obrigasaun atu hato’o nafatin ba Prezidente Repúblika kona-ba kontinuasaun Governu Jestaun ne’ebé iha tanba tuir Konstituisaun no Lei sira katak VI Governu Konstitusionál só ramata ninia mandatu bainhira Governu Foun simu pose ona.

Xefe Governu mós hato’o ba Prezidente Repúblika kona-ba preparasaun téknika atu fó apoiu ba governu bainhira avansa ba iha Orsamentu Rektifikativu. Tanba ne’e, Ministériu Finansas halo hela serbisu tékniku no analiza ba despeza orsamentu 2017 ninian depois fó informasaun ba governu ne’ebé sei forma, nune’e governu bele hola desizaun polítika oinsá atu orienta Orsamentu Rektifikativu ne’ebé sei tuir mai.

“Orsamentu Rektifikativu ne’e la’o bainhira programa governu hetan ona aprovasaun iha Parlamentu Nasionál. Entermus tempu, hafoin Governu Foun simu pose, iha fulan ida para aprezenta programa ba Parlamentu Nasionál (PN) no bainhira PN aprova ona programa maka depois foin bele lori Orsamentu Rektifikativu ba Parlamentu. Ne’e sei akontese purvolta iha Outubru nia laran,” Rui esplika.

Nia mós aprezenta ba Prezidente Repúblika kona-ba nivel tékniku tantu Unidade Planeamentu Monitorizasaun no Avaliasaun iha Gabinete Primeiru Ministru nia tutela namoos Ministériu Finansas liu-liu Diresaun Nasionál Orsamentu ninian ne’ebé halo ona traballu tékniku ida ne’e para governu foun mai foti desizaun sira ne’e ba oin.

Jornalista: Xisto Freitas | Editór: Manuel Pinto

Foto: Primeiru Ministru, Dr. Rui Maria de Araújo dada lia ho jornalista sira iha Palásiu Prezidente Nicolau Lobato, ohin dadeer, hafoin enkontru ho Xefe Estadu Lú Olo. Imajen Ajénsia TATOLI/Xisto Freitas