domingo, 13 de agosto de 2017

Komunidade Kaikoli Soe Lixu Arbiru, Tanba Fatin Laiha

PARTILHAR
Komunidade suku Kaikoli, postu administrativu Vera Cruz, munisipiu Dili kontinua soe lixu arbiru iha bairo laran, tanba fatin lixu sei menus alende seidauk iha konsiensia rasik hodi kontribui ba ambiente mo’os.

Rudolfo do Carmo, nudar komunidade suku Kaikoli hateten komunidade soe lixu arbiru iha bairo laran tanba ladun iha atensaun husi governu.

“Ita hotu haree foer sira ne’ebe namkari iha ita nia bairo laran, iha dalan ninin, iha baleta kuak, tanba ita nia autoridade local no ita nia governo, ladun servisu hamutuk, ida ne’e maka komunidade sira soe foer arbiru,” nia hateten, iha Dili.


Alende ne’e, nia dehan soe foer arbiru mos bele fo impaktu ba komunidade sira nia saude, tanba bele lori moras sira hanesan mear, malaria no seluk tan.

Entretantu tuir observasuan husi Xefe Departementu Saneamentu munisipiu Dili, Domingos dos Santos Suriano, katak komunidade sira laiha konsiensia hodi tau foer iha lixu fatin ne’ebe governu prepara ona.

“Fatin lixu ami prepara tiha ona iha suku laran, maibe komunidade laiha konsiensia tau foer iha fatin ne’ebe ami prepara ona,” nia observa.

Tuir nia, problema soe lixu arbiru la’os deit iha Kaikoli maibe kuaze iha Dili laran tomak, iha bairo-bairo sira foer sei nakonu iha fatin-fatin.

“Hanesan iha dalan bo’ot Mascarenhas, Kaikoli, Balide nian, maibe ami hamoos tutuir, e iha parte Kristal oin ami tau tiha fatin lixu bo’ot rua, maibe komunidade la fakar foer iha lixu ne’e,” nia kestiona.

Kona ba kestaun ne’e, nia promote sei buka solusaun hodi rezolve.

Brigida dos Santos, Est | The Dili Weekly
PARTILHAR

Author: verified_user

Publicação luso-timorense sem fins lucrativos

0 comentários: