Governu Inagura Edifísiu Ministériu Justisa

DILI, (TATOLI) – VI Governu Konstitusionál liuhosi Ministru Estadu, Koordenadór ba asuntu Administrasaun, Justisa no Ministru Administrasaun Estatál, Dionísio Babo Babo Soares inagura edifísiu Ministériu Justisa (MJ) foun iha Kaikoli, ohin.

“Ami ohin halo inagurasaun ba edifísiu foun Palásiu Ministériu Justisa nian hanesan ho modelu Europeu nian iha Timor-Leste”, dehan governante ne’e.

Governu disponibiliza osan hamutuk U$4 miloens resin ba dezenvolvimentu konstrusaun infraestrutura iha área administrasaun justisa ho modernu tebes.

“Governu foun mai bele uza edifísiu ne’e hodi servi di’ak liu tan elementu públiku iha futuru”, katak.

Iha fatin hanesan, Ministru Justisa, Ivo Valente afirma, inagurasan ba instalasaun prinsipál Ministériu Justisa nian bele bolu Palásiu Justisa Timor-Leste.


Palásiu Ministériu Justisa iha kontestu teknolójia tanba seguransa, servisu, dokumentu no sistema integradu.

Nia afirma, konstrusaun ne’e ho modelu Europeu nian maibé lori tempu naruk hodi konklui konstrusaun ne’e tanba hasoru obstakulu iha relasaun ho preparasaun tékniku.

“Ami hakarak tuir espesifikasaun ho dezeñu ne’ebé ita hasai iha 2010 ho orsamentu 4 miloen resin maibé Diretór Kompañia dehan katak depois halo kontrusaun subida inflasaun entaun sira hasai tan 6 miloens, signifika kompañia mak hetan konsekuénsia”, afirma tan.

Entretantu, Diretór Kompañia JMS, Gilman Santos hateten, konstrusaun edifísiu Ministériu Justisa mai hosi orsamentu hosi IV Governu nian ho montante U$4 miloen resin maibé halo despeza ultrapasa ba U$6 miloen no konstrusaun konklui iha VI Governu, ofisialmente halo inagurasaun.

“Ha’u hakarak hateten katak servisu ne’ebé ami halo ho fuan duni tanba ne’e governu foun mai bele utiliza edifísiu ida ne’e ho di’ak tanba konstrusaun ne’e halo ho orsamentu boot ne’ebé mai hosi governu ho osan U$4 miloen resin maibé ami nia despeza ultrapasa U$6 miloen”, realsa nia.

Nu’udar timoroan hakarak servisu ho responsabilidade, mezmu hasoru obstakulu oioin maibé parte ida orgullu tanba konsege termina edifísiu di’ak Ministériu Justisa nian iha Timor-Leste.

Jornalista: Zezito Silva | Editora: Rita Almeida

Foto: Edifisiu ministériu justisa iha área Kaikoli ne'ebé hetan inagurasaun, ohin. Foto Tatoli/Egas Cristovão