sábado, 19 de agosto de 2017

CNRT Sei Kolabora ho Governu iha PN

DILI, (TATOLI) – Prezidente Partidu Kongresu Nasionál Rekonstrusaun Timor (CNRT-sigla portugés), Kay Rala Xanana Gusmão hateten CNRT sei kolabora ho Governu iha Parlamentu Nasionál (PN) liuhusi opozisaun konstrutiva.

Kay-Rala Xanana Gusmão hato’o kestaun ne’e bainhira sorumutu ho estrutura partidu FRETILIN iha Hotel-Novo Turismo, Lecidere, Dili, sesta lorokraik ne’e, hodi deskuti oinsá atu kolabora ho governu foun.

Nia esplika opozisaun konstrutiva ne’ebé CNRT halo maka buka konsensu ho partidu sira seluk hodi deskute asuntu importante sira hanesan Orsamentu Jerál Estadu no lei sira seluk iha komisaun eventuál molok lori ba plenária parlamentu hodi diskute no aprova.

“Ba interese nasionál ami sei kontribui. Iha tinan 2013 to’o mai agora, iha buat balun ne’ebé partidu sira hotu iha Parlamentu Nasionál deskuti uluk no konsensu molok lori ba plenária. Ida ne’e maka ami sei kontinua ba oin”, dehan Xanana.


Eis Primeiru Ministru ne’e hateten demokrasia no opozisaun ne’e la signifika “asal bunyi” maibé buka kontribui asuntu interese nasionál iha Parlamentu Nasionál.

Nia hatutan durante ne’e CNRT akompanha líder FRETILIN kontaktu ho partidu sira seluk hodi forma Governu no tuir nia katak la’ós kestaun sé maka túr iha governu no sé maka lae maibé kestaun maka oinsá hotu-hotu serbisu hamutuk atu lori nasaun ne’e ba oin.

Iha enkontru ne’e, Xanana akompaña hosi nia Sekretáriu Jerál, Francisco Kalbuadi Lay, Primeiru Vise Prezidenti, Virgílio Smith no Prezidenti Komisaun Diretiva, Dionísio Soares Babo.

Enkuantu, Sekretáriu Jerál FRETILIN, Marí Alkatiri hetan akompaña hosi vise prezidente partidu no adjuntu sekretáriu jerál partidu.

Jornalista: Xisto Freitas | Editora: Rita Almeida

Foto: Xanana Gusmão akompaña presta deklarasaun ba jornalista sira sobre formasaun governu hafoin hasoru malu iha Hotel Novo Turizmu, ohin. Foto Tatoli/Antonio Goncalves

Sem comentários: