Governu Foun Tenke Garante Dalan Diak Ba Joventude

DILI – Governu foun tenke garante dalan diak ba joventude sira nia direitu, tanba nee sidadaun hotu ezerse direitu atu hodi deside partidu politiku ba ukun, hodi dezenvolve nasaun nia futuru.

Tuir Joventude feto Edit Monteiro Quintas neebe foin Primeira ves tuir eleisaun hatete, ohin loron nee nia  kontente tebes tanba objetivu nia ba iha sentru votasaun nee,  atu hodi  hili partidu neebe mak aban bainrua atu tau matan ba povu tomak, no mos atu sai  lider neebe mak diak hodi servi nasaun doben ida nee.

“Hau husu partidu se deit mak sae ba ukun atu haree ba dezenvolvimentu iha rai laran, liu-liu area ekonomia, edukasaun, kampu servisu ba ami joventude, aleinde mos haree area seluk tan neebe mak durante nee lao seidauk los atu bele haloos fila fali,” katak Edit ba STL iha sentru votasaun Suku Bairu Pite eskola Hans Klemm Sabadu (22/07/2017).

Nia hatete, hanesan joventude, foin primeira ves  tuir eleisaun, nia husu se deit mak sae ba ukun atu tau preoridade ba futuru joventude nian liu-liu ba  parte edukasaun nian, hodi loke bolsu estudu ba joven sira neebe mak iha kapasidade hodi bele estudu iha rai liur, hodi fila mai dezenvolve nasaun ida nee.

Nunee mos Francisco Trindade Salveiro hanesan komunidade husi Aldeia Rio de Janeiru Suku Bairu Pite hatete, ohin mai nee kumpri sira nia obrigasaun hanesan sidadaun Timor-Leste, tenke tuir votasaun.

Nunee mos Joventude Felisberto Amaral joventude mane hatete, hanesan sidadaun joventude husu ba governu foun atu tau atensaun ba povu tomak hodi hasai povu husi kain no mukit atu lori povu ba moris diak. Guilhermina Franco

Suara Timor Lorosae