Fretilin akuza alegasaun intimidasaun hosi apoiante sira PLP nian iha Laga

Fretilin, partidu daruak ne'ebé hetan liu votasaun iha Timor-Leste, iha loron-sesta ne'e akuza simpatizante sira hosi Partido de Libertação Popular (PLP) halo intimidasaun ba eleitor sira iha distritu Baucau, kesar ne'ebé partidu rejeita no ne'ebé maka hetan ona investigasaun hos autoridade sira.

Iha komunikadu ne'ebé fó sai antes eleisaun lejislativu sira, ne'ebé akontese iha loron-sábadu, Frente Revolucionária do Timor-Leste Independente (Fretilin) hatete katak, "durante loron hirak ikus ne'e, membru balun hosi Partido de Libertação Popular (PLP) halo intimidasaun ba komunidade sira" iha suku oioin iha zona Laga nian, distritu Baucau, "ameasa katak bainhira sira la vota ba iha nia partidu sira nia uma sei hetan estraga no sé maka vota kontra PLP sei mate".

Fretilin hato'o kazu ne'e ba autoridade eleitoral sira no ba forsa sira seguransa nian no husu "atu observa no halo prevensaun seguransa ba komunidade sira hosi área sira ne'e hodi permiti atu sira bele uza sira nia direitu demokrátiku ho liberdade", refere hosi sekretáriu-jeral adjuntu partidu nian, José Reis, ne'ebé haktuir iha komunikadu.

Partidu husu ba observador sira iha fatin sira ne'e hodi iha "atensaun ba situasaun ne'e" no ba populasaun hosi Laga "hodi labele tauk", hodi fó korajen ba membru sira hosi komunidade hodi hato'o kesar ba iha polísia.

Fidelis Magalhães, númeru daruak hosi PLP, hatete ona ba Lusa katak laiha koñesimentu ba insidente ruma ne'ebé hanesan hato'o hosi Fretilin, hodi afirma katak "komunikadu ne'e hanesan propaganda antes eleisaun sira".

"Fretilin hanesan partidu daruak ne'ebé hetan liu votu iha nasaun. No ladún iha sentidu atu militante sira hosi Fretilin hetan ameasa iha Laga. Ha'u tenta konfirma ona ho ami nia ema sira iha Laga. Sira nega katak laiha ameasa ruma no hatete katak buat hotu la'o hanesan baibain", nia afirma.

"Tanba sira hato'o ona kesar ami sei hein rezultadu hosi investigasaun hosi órgaun kompetente sira no ami lakohi atu ne'e sai hanesan propaganda ida antes eleisaun. Iha sinal sira katak ne'e bele hanesan propaganda antes eleisaun nian", nia hatete.

Alcino Barris, prezidente hosi Komisaun Nasional ba Eleisaun nian (CNE), konfirma ona ba Lusa katak entidade simu kesar hosi Fretilin no hafoin ne'e halo kedas asaun ba kazu ne'e, insisti ona ba Polísia Nasional Timor-Leste nian (PNTL) hodi investiga lalais saida maka akontese.

"PNTL iha kompeténsia hodi investiga no hodi atua lalais bainhira presiza, hodi haree loloos saida maka akontese no sé maka sai hanesan autor ba asaun sira hanesan ne'e", Baris hatete.

"Ami tenki buka hatene uluk saida maka akontese. Ha'u la fiar katak partidu polítiku rasik maka halo ida ne'e. Maibé iha nafatin simpatizante ida ka ema balun maka halo asaun sira hanesan ne'e, no bainhira akontese, hanesan krimi eleitoral ida, impedimentu ba liberdade hodi hili iha eleisaun", nia afirma.

Eleisaun lejislativu sira iha Timor-Leste hala'o iha loron-sábadu. Fatin votu sira loke entre tuku 07:00 to'o 15:00, oras lokal.

SAPO TL ho Lusa | Foto@ António Dasiparu /EPA