CNE: Votasaun iha Timor-Leste la'o lahó insidente grave, ho partisipasaun di'ak

Prezidente Komisaun Nasional ba Eleisaun timoroan nian hatete ona katak eleisaun lejislativu ne'ebé halo iha loron-sábadu ne'e iha Timor-Leste la'o ho normalidade, lahó insidente grave sira, ho partisipasaun di'ak ida hosi eleitor sira no prezensa "ativu" hosi fiskal partidáriu sira no observador sira.

"Iha jeral, situasaun hanesan kontroladu, buat hotu la'o ho di'ak, ho atendimentu di'ak hosi parte autoridade eleitoral sira", Alcino Baris hatete ba jornalista sira iha sentru imprensa CNE nian iha Díli.

"Ami iha partisipasaun di'ak ida, ho prezensa hosi fiskal barak hosi partidu polítiku sira, ho observasaun maka'as hosi CNE ho prezensa hosi observador internasional sira no nasional sira", nia explika.

Nia hatete mós katak akontese de'it situasaun ki'ik balun durante dadeer, hanesan atrazu oituan iha votasaun iha fatin votu rua tanba hotu tiha boletin sira no tenki lori fali ba fatin votu sira ne'e ho eskolta hosi polísia.

Baris ko'alia ba jornalista sira bainhira hala'o hela kontajen, prosesu ida ne'ebé karik sei hotu ofisialmente iha loron hirak tuirmai ne'e.

SAPO TL ho Lusa